Azaroko egitaraua aurkeztu du Euskaraldiko Batzordeak

Izar Mendiguren Cosgaya 2018ko aza. 7a, 09:21

Laudio BHIko ikasleek Euskaraldia bultzatzeko egindako argazkia. / Laudio BHI

Igandean, azaroaren 11n, kultura arteko murala egingo dute Lamuza eskolan, Bizilagunak egunaren baitan.

Azaroaren 23an hasiko da Euskaraldia, hamaika eguneko Euskal Herriko ekimena. Eskualde osoan bezala, Laudion ere Euskaraldiko Batzordea aritu da egitasmoa antolatzen. Hala, hilabetean zehar makina bat ekitalditan parte hartuko dutela jakinarazi dute: "pintxopoteetan", Laudioko krossean, Korrontzi eta Itxarkundiaren emanaldian...

Bizilagunak dinamikaren baitan, Lamuza Eskolako pareta bat margotuko dute auzolanean, aurreratu dutenez. "Guztiok gara euskararen herria" lemapean, hainbat kulturetako herritarrengana euskara gerturatzea izango da helburua. 13:00etan izango da hitzordua.

Azaroaren 23an, hasiera jaia
Ahobizi zein Belarriprest izateko izena emateko guneak jartzen jarraituko dute, internet bidez apuntatzeko aukera badago ere. Bestetik, Euskaraldiari hasiera emateko makina bat ekintza antolatuko dituzte. Laudioko Herriko plaza bilakatuko dute euskaradunen topaleku, 17:30etik aurrera umeentzat tailerrak egongo dira Kirikiñoren eskutik, eta Sorginlarren taldeak buruhandi mitologikoak aterako ditu. 19:00etan txapa banaketari ekingo diote, eta Ainhize Solaun Mendigurenek gidatuta Euskaraldiko koreografia egingo dute segidan. 19:30ean, aldiz, txupinazoa jaurtiko dute, eta "topa herrikoia" gauzatuko dute ondoren. Euskara herrian barrena hedatzeko, berriz, poteo musikatua egingo dute kalez kale.

Abenduaren 2an Laudion ospatuko dute eskualdeko euskararen eguna, Amurrio eta Urduñari lekukoa hartuta.

Euskara Laudio

LAGUN AGURGARRIA:

Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.

Izan bazkide