Astebete egon dira Atenas inguruan Laudioko sei ikasle. Esperientziaren nondik norakoak azaldu dizkiete Aiaraldea hedabideari.
Polonia, Portugal, Grezia eta Euskal Herriko gazteak harremantzea du helburu, besteak beste, Erasmus+ proiektuak. Hala, Acharneseko (Grezia) ikastetxeaz gain, bertako zenbait toki bisitatu dituzte: akropolia, folklore museoa...... "Kaletik gure proiektuari buruzko materiala banatzen ere aritu ziren gazteak, Greziako koordinatzailearekin", kontatu du Udiaarraga Abrisketa irakasleak. Agora eta museo arkeologikoa ikusi zituzten ostean.
Epidauroko aintzinaroko antzokia eta Napflio Greziako lehen hiriburua ere ezagutu dituzte, portua barne. "Irakasle atzerritarrekin egon dira gure ikasleak antzokian, eremuari buruzko azalpenak eman zizkiguten", gogoratu du.
Atzo amaitu zuten bidaia, eskolako antzerki emanaldiarekin: "Ikasle guztiek eta irakasle batzuk hartu genuen parte. Horren ostean, ikastetxe bakoitzak olibondo bat landatu zuen, eta jarraian diploma eta oparitxoa eman ziguten". Bukatzeko, talde greziar baten kontzertua izan zuten.
Ikasleek oso positiboki baloratu dute bidaia: "Ahaztuko ez ditugun lagunak egin ditugu familietan eta eskolan". Guztira, DBHko 30 ikasle ari dira egitasmoan parte hartzen. "Izugarrizko esperientzia izan da Greziako bidaia", baieztatu dute nola ikasle hala irakasleek. Zerk harritu dituen gehien galdetuta, jaten duten elikagai kantitatea eta euskararekiko interesa nabarmendu dute ordezkariek.
Argazkiak: Udiarraga Abrisketa eta Miren Larrazabal