aiaraldea.eus

Aurrekontuak aurkeztu ez izana eta lanpostuen zerrenda moldatu nahi izatea leporatu dio Omniak EH Bilduri

Erabiltzailearen aurpegia Erredakzioa   Politika  Laudio

EH Bilduri “euskara soilik” interesatzen zaiola kritikatu du alderdi laudioarrak. Udal gobernuak, bere aldetik, urtarrilean onartutako euskara planaren aurka joatea egotzi dio oposizioko taldeari.

Aurrekontuak aurkeztu ez izana eta lanpostuen zerrenda moldatu nahi izatea leporatu dio Omniak EH Bilduri
Otsaileko Udal Osoko Bilkuran izan zuten hizpide lanpostuen zerrendaren moldaketa. / Aiaraldea.eus | Ikusi handiago | Argazki originala

Omniak prentsa-oharra plazaratu du udal gobernuarekiko hainbat kritika agertzeko. Alderdi laudioarrak azaldu du ez zela iragan asteartean eginiko Ogasun eta Funtzio Publikoaren batzordera bertaratu, udal gobernuak ez zuelako gai ordenean inolako punturik sartu. “Harrigarria da hori egitea, agerian geratu denean hainbat fronte ditugula irekita, konpontzeke”.

Landu beharreko puntu horietako batzuk dira aurrekontuak, lanpostuen zerrendaren moldaketa eta lan eskaintza publikoa, Omniaren aburuz.

Aurrekontuak
Alderdi laudiorraren ustez, batzorde horretan aurrekontuen zirriborro bat aurkezten ez bada, udal hauteskundeen ostean sortzen den udal gobernu berriak aurrekontuen luzapenarekin lan egin beharko du, “bigarren urtez jarraian”. “Horrek ekarriko du diru-partidak gaurkotu ezin izatea eta aurreko urteetan finantziazio aldetik eskas geratu ziren partidek kreditu handitzea behar izatea, beste behin. Hau da, gauzak gaizki egingo dira beste urte batez”.

Lanpostuen zerrenda eta euskara
Otsaileko udalbatzan eztabaidatu zen lanpostu zerrendaren moldaketa proposamena ere kritikatu du Omniak. EH Bilduk aurkeztu zuen proposamena, baina ez zen aurrera atera. Omniaren iritziz, moldaketak planteatzen zuena egiten bada Laudioko Udala bihurtuko litzateke “bere lanpostu publiko guztiak hizkuntza perfil zehatz bat duten pertsonetara mugatzen dituen EAEko udalerri bakarra”. Oposizioko taldearen hitzetan, beharrezkoa da lanpostu zerrenda gaurkotzea, baina beste hainbat gauza kontuan izanda. Zentzu horretan, lanpostu eskaintza publiko baten beharra dagoela nabarmendu du Omniak, hutsik geratzen diren funtzioak “modu prekarioan partxeatzeari” uzteko.

Zentzu horretan, lanpostu eskaintza hori osatzeko irizpideak talde politiko guztiekin adostuta garatu behar direla argudiatu du alderdi laudioarrak. “Honetan guztian gauza bakarra geratzen zaigu argi: Laudioko EH Bilduri euskara soilik axola zaiola”. Era berean, udal gobernuak “bere hurbileko taldeak” baliatzen dituela salatu du Omniak, “euskara eta euren euskara eredua toki guztietan islatuta geratu dadin”.

Oposizioko taldeak adierazi du euskararen normalizazioaren alde daudela eta lan egingo duela hori errealitate bat izan dadin, “baina inori ezer inposatu gabe egingo dugu hori eta, batez ere, horrelako gai garrantzitsuek eskatzen duten adostasuna bilatzen”.

Udalaren erantzuna
EH Bilduk otsaileko Udal Osoko Bilkuran erantzun zien Omniak eginiko kritikei. “Euskara planaren aurka” egin duela uste du udal-gobernuak, plan horretan lanpostu zerrendaren moldaketa hori egitea aurreikusten zelako. “Urtarrilean plan horren alde bozkatu zuen Omniak, baina otsailean plan hori lotesle izatearen aurka bozkatu zuen”.

Erantzunak

Erabiltzailearen aurpegia Aitite Erantzuna | #1

Kontuz!!! Hauek nolako arriskua duten. Omniak euskararen inguruan egiten duen hausnarketa VOXek ere erosiko luke. Betiko leloaren betiko leloa. Euskararen alde daude baina ez dute inposatuz ezer egingo. Inposatu??? Noski, ahaztuta nuen, espainola ez da inposatu herri honetan, berez hartu genuen poz pozik eta orain "vienen los abertxales" esatearekin nahikoa dute euskararen aldeko ezein mugimendu praktiko eta erreala gutxiezteko.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa