Laudioko alkateordea den Amets Meatzak gidatu zuen saioa. Darocan preso dagoen Galder Barbadori elkartasun keinu bat eginez hasi zuen ekitaldia, eta Ainhize Solaunek hartu zuen hitza gero.
EH Bilduko Aiaraldeko zerrendaburua izango da Solaun datozen Foru Hauteskundeetan. Aldundira eraman nahi dituzten proposamen eta proiektuez mintzatu zen gazte amurrioarra. Aiaraldean ospitale bat eraikitzearen beharra azaldu zuen. Era berean, eskualdeko egoera sozioekonomikoari buruzko ponentzia aktibatzea “funtsezkoa” dela nabarmendu zuen zerrendaburuak, eta “alokairu soziala” ere aldarrikatu zuen, “gazteentzako etxebizitza komunitarioak” sortzearen aukera proposatuaz, besteak beste.
Kike Fernandez de Pinedok hitz egin zuen jarraian. Arabako egoera ekonomikoa ere izan zuen hizpide. Langabeziaren jaitsieraren atzeko errealitatea kontatu zuen, besteak beste: “langile pobreak sortzen ari gara, kontratu oso motzak dituztenak”. Hori dela eta, hautagaiak azpimarratu zuen “gaizkien dauden pertsonen alde” egiten dutela lan. Lehenengo sektorea birplanteatu behar dela ere aipatu zuen, “politika industrial berri” baten beharrarekin batera. Energia eredua aldatu eta kuadrillen arteko desorekak deuseztatu behar direla ere gaineratu zuen arabarrak.
Berna Ortiz gogoan
Iñaki Ruiz de Pinedo izan zen hitza hartzen azkena. Laudion Frankismo amaieran egondako borrokak ekarri zituen gogora, eta iragan asteburuan zendutako Berna Ortizen lana ere izan zuen hizpide. Horrez gain, Pablo Gorostiaga eta Pablo Isasi goraipatu zituen Espainiako Gorte Nagusietarako Arabako zerrendaburuak. “Ziur nago eurak gobernatzen zeudenean gazteak atxilotu edo Lezamako baserri bat tirokatu izan balute beste modu batera jokatuko luketela, eta Santiago Abascalen faxismoari aurre egingo lieketeela”.