aiaraldea.eus

Omnia: “Ez dugu txandaketarekiko alternatiba izatea lortu, baina lanean jarraituko dugu”

Erabiltzailearen aurpegia Txabi Alvarado Bañares   Politika  Laudio

Alvaro Barriosek ziurtatu du zinegotzi moduan arituko dela legealdi honetan. Eurengan konfiantza jarri duten herritarrei eskerrak eman dizkiete alderdi laudioarreko kideek, eta kanpainan izan duten "talde eta sakrifizio izpiritua" goraipatu dute.

Omnia: “Ez dugu txandaketarekiko alternatiba izatea lortu, baina lanean jarraituko dugu”
Omniak iragan ostiralean eginiko hauteskunde kanpainaren amaierako jaiaren irudia. / Aiaraldea.eus | Ikusi handiago | Argazki originala

Igandeko udal hauteskundeak baloratzeko prentsa oharra plazaratu du Omniak. Alderdi laudioarrak EAJ zoriondu du lortu dituen emaitzengatik. “Badakigu hautagai, zerrenda eta programa onenak genituela eta kanpainarik onena egin dugula, dudarik gabe, baina herritarrak burujabeak dira eta hitz egin dute”.

Alvaro Barrios alkategai zuen taldeak hiru zinegotzi lortu ditu, duela lau urte baino bat gutxiago. Hala ere, taldeko kideek eskerrak eman nahi izan dizkiete euren proiektuan “benetako alternatiba bat” ikusi duten 1.807 bizilagunei. “Emaitza ona” izan dela nabarmendu dute Omniako kideek, “genuen testuingurua kontuan hartuta, baina irabazi behar genuen herri hau aldatu ahal izateko eta ez dugu lortu”. Lanean jarraituko dutela azpimarratu dute, eurengan konfiantza jarri duten pertsona guztiengatik.

Alvaro Barrios zerrendaburuak ziurtatu du zinegotzi moduan arituko dela legealdi honetan. Iragan legealdian kargua utzi behar izan zuen, lanagatik.

“Talde eta sakrifizio izpiritua”
Omniako kideek balioan jarri nahi izan dute euren “talde eta sakrifizio izpiritua”.  “Beste talde batzuk ez bezala, gure irudi eta esaldi bakoitza bulego txiki batetik ateratzen da, guk eraiki eta diseinatzen ditugu. Eskuorri eta paper bakoitza guk tolestu eta sartu dugu postontzian”. “Itzalpeko lan hori” preziatu egiten ez dela uste dute alderdi laudioarreko kideek eta, horregatik, eskerrak eman nahi izan dizkiete lan hori gauzatzen lagundu duten bizilagun guztiei. Hala ere, alderdi laudioarreko kideek aitortu dute ez dutela lortu bi alderdi nagusien txandaketarekiko alternatiba izatea.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa