Ugarteko Jaietako hainbat ekintza antolatuko ditu aurten Ugarteko Gazteak elkarteak. “Jai herrikoiak” sustatzea da taldearen helburua, “egitarau oparoarekin”.
Iaz jarri ziren horri begira lanean, azken urteetan jaiak antolatzen egon zen taldea desegin zenean. Bilera egin zuten auzoko “adin eta profil ezberdinetako” gazteen artean, zer eta nola egin pentsatzeko. “Denbora luzez gazteon artean hitz egin zen jaietako hainbat gairen inguruan. Modu horretan, lehenengo pausuak ematen hasi ginen”. Nabarmendu dutenez, zailtasun ugari utzi dituzte bidean, eta aurreratu dute ez dutela nahiko luketen guztia antolatzerik izango.
“Trantsizio urtea”
Gauzak hala, aurtengoa “trantsizio urtea” izango dela uste dute Ugarteko Gazteek. “Gazteok jaiak osotasunean gure gain hartzeko aukera izan ez dugunez, urtero egin izan diren ekintzak egiten jarraituko dugu. Hemendik aurrera garrantzia eman nahi diegu Ugarteko jendeak zein Laudioko beste elkarte askok antolatutako jarduerei, gure aburuz eurak baitira jaiei bizitza ematen dietenak”.
Auzoan “jai eredu berria” sustatu nahi dute Ugarteko Gazteek. Aurtengoa trantsizio urte gisa markatu dute, aldaketa hori gauzatzeari begira
Hala ere, ekintza berri ugari prestatu dituzte aurtengo jaietarako. Abuztuaren 1ean umeen eguna antolatuko dutela aurreratu dute, besteak beste. “Arratsaldean umeentzako eskaintza oparoa izango dugu tailer, eskulan, puzgarri, buruhandi zein pailazoekin eta barraken prezioa murriztua egongo da. Hurrengo asteetan finkatuko da behin betiko egitaraua”.
Jai eredu berria
Kritiko azaldu dira elkarteko kideak orain arte garatutako jai ereduarekin. “Ugarteko jaiek urteetan izandako ospea ezerezean geratu da. Nagusitu ahala jaiek beste eredu bat izan dezaketela ikusten duzu eta hori aurrera eramatea Ugarteko gazteon esku egon behar dela uste dugu, argi eta garbi”. Bizilagunen inplikazioa sustatu nahi dute, auzokideak kalean nahi ditugu auzoa bizi bizirik egotea lortzeko.
Horrela, elkarteko kideek badakite aurretik duten bidea ez dela erraza izango. "Gauzak antolatzeak jo-mugan jartzera eramaten zaitu eta, edonon bezala, jende ugari dago asko hitz egin eta gero gutxi egiten duena. Hala ere, emeki-emeki urratsez urrats jai herrikoak lortuko ditugunaren konfiantza osoa daukagu eta aurrerapauso hori emateaz oso harro gaude”.
