Hasi dira dagoeneko Laudioko Kultura Etxea eraberritzeko obren lehen fasea. Eraikinen sabaiak eta leihoak berritzea izango da lanen xedea, besteak beste. Altzairuzko hezurdura mehe batzuez osatutako kristalak jarri nahi ditu Aldundiak, “jauregiak XX. Mendearen hasieran zuen itxura berreskuratzeko”. Teilatuak berrituta, aldiz, isolamendu termikoa hobetu nahi dute. 3,3 milioi euro baliatuko dituzte guztira.
Erabiltzaileengan “ahalik eta eragin txikiena” izatea helburu
“Obrek Kultura Etxeko erabiltzaileentzako izango duten eragina ahal bezain beste txikitzen saiatuko gara”, jakinarazi du Ander Larrinaga zinegotziak, “bertako kultur elkarteekin harremanetan gaude euren jarduerak bertan behera utzi ez ditzaten, alternatibak eskainiz. Kasu gehienetan ez da arazorik egongo. Kasu batzuetan, aldiz, bai, mugitu ezin daitekeen ekipamendua dutelako. Kasu horietan baliteke uneren batean ekintzaren bat bertan behera utzi behar izatea, baina denborarekin abisatuko zaie, ahalik eta eragin txikiena izateko”.
Berrikuntza lanak urtebete baino gehiago luzatuko direla aurreratu du udal ordezkariak, “datorren urterako ez dira guztiz amaituak egongo”. Horrez gain, Ortuzainaren etxeari begira, erabilera batzuk pentsatuak dituztela jakinarazi du Larrinagak, “baina aurrerago emango dugu horren berri”.
