Asier Ispizua Hajime klubeko kirolariak K1 Slam borrokaldian parte hartuko du otsailaren 8an La Casillan. Laudioarrarentzat hitzordu berezia izango da, puntako ekitaldia baita.
"Aurtengoa 6. edizioa da eta garrantzitsuena izango da. Enfusion eta YSKA txapelketetako irabazleak kontratatu dituzte. Munduko eta Europako txapeldunak, alegia" azaldu du kirolariak.
Aurreko edizioan ere egon zen Ispizua: "Irabazi nuen eta uste dut oso itxura ona eman nuela. Horregatik hartu naute berriro aintzat".
Muay Thai ("Sarikadong" profesional famatuarekin) eta K1 diziplinak ez ezik, boxeoa eta MMA kirolak ere landuko dituzte.
Boxeoan, esaterako, Jon Fernadez Etxebarriko kirolaria arituko da. Hainbat aldiz txapelduna izan da hainbat federazioetan eta Estatu Batuetan ere behin baino gehiagotan borrokatu da.
MMAn Jose Jimenez eta Enoc Solves igoko dira ringera. Biak lehiatzen dira M1 liga errusiarrean eta Enoc Solves UFC txapelketa amerikar ospetsuan borrokatzeko bidean dago.
Asier Ispizua Luigi Aranaren aurka
Asier Ispizuari dagokionez, Luigi Arana izango du aurrean. Arana bolibiarra da jatorriz, baina Bilbon bizi da eta Elite Sport taldeko kidea da.
Aurretik birritan adostu dute borroka, baina ezin izan dute gauzatu. Laudioarrak azaldu du: "Mix Fight batean borrokatu behar ginen, baina nik lesioa nuen begian eta ezin izan nintzen lehiatu. Beste Mix Fight batean ere neurtu behar genituen indarrak, baina, azkenean, beste aurkari batzuk egokitu zitzaizkigun".
K1 Slam borrokaldia ikusteko, Ispizuak azaldu du bi aukera daudela. Alde batetik, Kutxabank bidez sarrerak lortzea edo berarekin harremanetan jartzea horretarako, bere Instagram kontua erabilita.
