Langile Komisioak sindikatuak salatu du amiantoarekin harremana izateak Laudioko Udaleko langile baten gaixotasuna sortu duela, plaka pleuralak diagnostikatu baitizkiote.
Sindikatuak adierazitakoaren arabera, langilea 1982 eta 1989 urteen tartean egon zen amiantotik hurbil, zabor bilketan lan egiten zuelako, “maiz aurkitzen zituen amiantoa zuten obren hondakinak, ez baitzen bilketa selektiborik egiten”.
Laudioko transferentzia plantan ere ibili zen behargina, non eskualde osotik ekarritako zaborra trinkotzen zen. Han, Laudioko zaborra biltzean gertatu bezala, “suspentsioan zegoen hautsa sortzen zen”, eta “fibrozementua eta amiantoa” tartean zeudela kritikatu du CCOOk.
Era berean, garai horietan amiantoaren arriskuei aurre egiteko “arnasketarako babesik edo neurri prebentibo jakinik” ez zegoela gogoratu dute ohar batean.
2010ean langilea berriz egon zen fibrozementuarekin harremanean, sindikatuaren aburuz. Lamuzako urmaela garbitzen zegoela fibrozementuzko tutu apurtuak manipulatu eta tokiz mugitu behar izan zituela adierazi dute.
CCOOk gehitu du langilea Latiorro eta Fabian Legorburu eskoletako atezaina izan zela eta 2017an bi hezkuntza zentroetan amiantoa zegoela.
Hortaz, Laudioko Udalari herrian dagoen amiantoaren inbentarioa egitea exijitu diote oharrean, ondoren “era ziurrean eta behar diren neurriak hartuta” kendu ahal izateko. 2012an amiantoa dela eta Kepa Galdos udal-langilea hil zen eta udalak kalte ordaina ordaindu behar izan zuen.
