Etorkizunean erabiltzeko produktu edo zerbitzuak aurrez erostean datza ekimena, "konfiantzazko enpresei ziurgabetasun garai honetan mantentzen laguntzean". Hala adierazi du APILLek prentsa oharrean. Horretarako, izen-emate fitxa bat sortu dute, saltokietako datuak biltze aldera. Hala, establezimenduaren izena zein harremanetarako modua bilduko dute; ordainketa bidea -bizuma, transferentzia edo paypal sistema-, negozioaren deskribapena, logoa, webgunea eta irudi batzuk barne. Apirilaren 27 arte egongo da izena emateko aukera. "APILLekin elkartuta ez dauden komertzioek enpresaren izena, IFK, harremanetarako modua ere adierazi beharko dute", erantsi dute.
"Laudio aurreirekiera bonoa" izena jarri diote kanpainari, eta Laudioko Udalak babestu du ekimena. Herritarrek -hots, bezeroek- bono trukagarriak erosi ahalko dituzte horrela, establezimenduak irekitzen direnean.
Egitasmoa bideratzeko "Gure laguntza" plataforma erabiliko dute, Arabako beste gune askotan bezala. "Oraingoan bonoak digitalak izango dira, eta bezeroek plataforman online erosi ahalko dituzte establezimendu bakoitzarentzat erreserbatutako espazioan; ondoren, salmenta puntuan trukatzeko", zehaztu dute. Egitasmoa aurrera eramateko gutxienez 30 saltokik egin beharko dute bat dinamikarekin.
Herritarrentzat onurak
Zein onura izango dute herritarrek? Ostalaritzaren kasuan 8 eurotan erosi ahalko dira bonoak, baina 10 euroan balioetsita daude. Merkataritza eta zerbitzuei dagokienez, 30 eurokoa izango da aurreirekierako txartela, baina bezeroek 25 euroan eskuratuko dute. "Bonoetan aplikatutako hobaria Udalak hartuko du bere gain".