Laudioko Udalak errepikatutako esleipena irabazi zuen Jon Atxak Ermualdeko taberna kudeatzeko. Apaizetxea izandako eraikinean taberna eta jatetxea irekiko ditu laudioar gazteak ekainaren 4an, osteguna.
Atxak Aiaraldea Hedabideari azaldu dio euren asmoa dela goizetik arratsaldeko azken ordura arte irekitzea, asteartetik larunbatera, eta igandean bazkalostean ixtea, astelehenean atsedena hartzeko.
Taberna zerbitzua ez ezik, bertan bazkaltzeko eta afaltzeko parada emango dute asteburuetan, baina horretarako aldez aurretik jakinarazi behar zaie Instagram bidez (@kumeak_santalu).
Esleipenak eskatu bezala, Atxak tokiko ekoizleen produktuak landuko ditu bere menuetan eta "mendiko tabernek eskaintzen dutena ez ezik, asteburuan zer edo zer finagoa ere egongo da".
Errumaniatik Ermu Andra Marira
Jon Atxak ibilbide luzea egin du ostalaritzan. Laudion eta Amurrion tabernak izan ditu eta Ibizan zein Andorran aritu da beharrean. Errumanian -bertakoa baita jatorriz bere bikotea- jatetxea ireki zuen eta bazkideekin salmenta adostu ostean sartu zen buru belarri "Kumeak" proiektuan.
Izen hori hautatu dute egitasmoa berria delako eta Atxa eta bere bikotekidea beti izan direlako euren lanpostuetan gazteenak: "Umeak nagusi egin dira eta asko dakite jadanik".
Errumanian zuen jatetxea itxi ostean, Atxak asmoa zuen atsedenaldia hartzeko, baina berak azaldu duenez: "Ermu Andra Marira igo nintzen eta hemengo lasaitasun eta bakeari esker sentitu nuen egon behar nintzen tokian nengoela".
Gurasoei eskertu die jakinarazi izana aukera hori zegoela: "Eurek esan zidaten apaizetxea oso txukun eta polita utzi zuela udalak, eta ikustera igo nintzen".