EUSKO LEGEBILTZARREKO HAUTESKUNDEAK

Independentismoaren eta eskuin muturraren aurrean alternatiba gisa azaldu da PSE-EE

Cristina Gonzalez eta Gloria Sanchez ordezkari sozialistek ekitaldia egin dute gaur goizean Laudioko Aldai plazan. Politika globalak garatzeko garrantzia nabarmendu dute eta horretarako PSE-EE aukera bakarra dela aldarrikatu dute.

Gloria Sanchez Eusko Legebiltzarreko Hauteskundetako Arabako zerrendaburua eta Cristina Gonzalez alderdiko Arabako idazkaria egon dira goizean Laudion ekitaldi politikoa eskaintzeko.

Prebentzio neurri zorrotzen artean egin dute agerraldia. Hasteko, Cristina Gonzalezek azpimarratu du COVID-19aren krisialdian eskuinaren estrategia tentsioa eta gatazka sortzea izan dela eta horregatik erakutsi duela zein atzerakoia den. Horren aurrean, zentzu guztietan, politikari sozialistak aldarrikatu du arazoei aurre egiteko modu egokiena akordioak lortzea dela.

Bestalde, Gonzalezek independentismoa kritikatu du eta adierazi du erronka globaletan Europar Batasuna ezinbestekoa dela. "Independentzia ez da lehentasuna, ardura larriagoak dituzte herritarrek", esan du.

Bere aldetik, Gloria Sanchezek behin eta berriro errepikatu du alderdi eraginkor bakarra egungo egoeratik ateratzeko PSE-EE dela: "Euskadin, Espainian eta Europan dauka eragina".

Sanchez "abenturazaleen" kontra agertu da eta azaldu du PSE-EE dela berme bakarra muturreko eskuinaren eta nazionalismoen kontra. Arabako zerrendaburuak argitu du herritarrak nekatuta daudela eta ez dutela gatazka gehiagorik nahi; ez identitateari lotuta, ez alderdi bereko kideen artean ezta erakundeen artean ere.

Zentzu horretan, honakoa ziurtatu du: "Gobernantza gauza serioa da eta sozialistek argi utzi dute kudeatzeko gai direla".

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide