Aiaraldea Hedabidea harremanetan jarri da EH Bilduko aurreko Udal Gobernu Taldearekin atzo zabaldutako oharrari buruz mintzatzeko. Koalizioak egin zuen publiko Amurrioko Epaitegiak Ibon Aiz laudioarra zigortu duela koalizioko ordezkariak mehatxatzeagatik.
Lehenik eta behin, Aiaraldeak galdetu die zergatik erabaki zuten salaketa jartzea, ohikoa baitira irainak alderdien aurka eta, bereziki, EH Bildu koalizioaren kontra. Talde politikoko kideek argitu dute: "Mehatxu oso-oso larriak izan ziren. Hautetsion eremu pertsonalari eragiten zioten. Aintzat hartzeko modukoak. Zentzu horretan, marra gorri guztiak gainditu ziren eta salaketa jartzea erabaki genuen."
Justiziaren erantzun ezberdinak
Horrez gain, antolakunde subiranistako kideek nabarmendu nahi izan dute legeak ez duela berdin jokatzen alderdi guztiekin: "Badirudi ez dela eskubiderik urratzen biktimak EH Bilduko hautetsiak direnean."
Zentzu horretan, politika dela medio espetxeratutako zenbait aiaraldearren egoera oroitu dute: "Gogora dezagun Alfredo Remírez eta Julen Ibarrola urtebetez espetxeratu zituztela, inor erasotu gabe. Alfredo, esaterako, sare sozialetan Pablo Gorostiagari ongi etorria egiteagatik zigortu zuten"
Zehatz-mehatz, beste alderdi batekin alderatu dute egoera: "Mehatxatuak EAJko alkate eta zinegotziak balira, argi dugu zigorra askoz gogorragoa litzatekeela. Justizia ez da berdina guztiontzat."
EAJrekin kritikoak
Azkenik, EH Bilduk hitz oso kritikoak izan ditu EAJrentzat, eta, bereziki, egungo Udal Gobernu Taldearentzat: " EAJren jarrera lotsagarria da. Alkateak ez du tutik ere esan. Ez da gugana zuzendu".
Horren ondorioz, koalizioko kideak oso minduta agertu dira: "EAJren isiltasuna oso adierazgarria da. Oso mingarria. Mehatxuak ingurumari jakin batetik etorri ziren eta hori bera da Laudioko alkateak eta EAJk babestu nahi dutena"
Bide batez, aurreko Udal Gobernu Taldean parte hartu zuten ordezkariek adierazi dute zein zen giro politikoa mehatxuak jaso zituztenean: "Eraso hauek 2015-2019 legealdiko EH Bilduren aurkako kanpaina egonkorrean kokatu behar dira. Sektore politiko batzuk EH Bilduren kontra edozerk balio zuela erabaki zuten".