Ikasturtea "gogotsu" hasi du Esti Urresola Solaguren zinemagileak. Sare sozialetan adierazi duenez, Zinema ikustezina Nazioarteko ZIne Jaialdian egongo da ikusgai bere lana. "Kulturartekotasun sailean hautatua izan da" zehaztu du. "Gure laburmetraiak giza eskubideen aldeko jaialdi honetan parte hartzea hunkigarria eta pozgarria da", adierazi dio Aiaraldea komunikabideari.
Laudioko Lamuza eskolako ikasleekin grabatu zuen ikus-entzunezkoa, eta kultur aniztasuna du ardatz. Hezkuntza zentroko guraso elkartearen laguntza izan zuen horretarako. Urriaren 15etik 22ra ospatuko da zinema jaialdi, Bilbon.
Aitortza ugari
Uneotan zuzendari eta gidoilari gisa ari da laudioarra lanean, 20.000 espercies de abejas lanarekin. Bere lehen filma luzea izango da eta momentuz garapen fasean dago. Horrez gain, La Incubadora de TheScreen ekimenaren hirugarren edizioan ari da parte hartzen, eta abuztuan Atelier Premiers Plans-Angersen hautatua izan zen. "Tailer hau, zuzendari berriei bideratutako formakuntza-elkartze bat da. Bertan, lehen mailako profesionalekin euren proiektuei buruz eztabaidatzeko aukera izan nuen beste 6 egoiliarrekin batera", erantsi du.
Laburmetrai berria, aurki
Horrez gain, laster estreinatuko du lan berria, Polvo somos izenburuduna. "Urte hasieran grabatutako azken pelikula da, postprodukzioaren azken fasean dago", aipatu du. Gasteiz inguruan filmatu zuen eta "berehala" ekingo dio banaketa faseari. Aktoreen artean Ilargi Molinillo laudioarra ere badago, "ilobaren paperean". Horrez gain, ondorengo antzezleak azaltzen dira: Jone Laspiur, Goize Blanco, Klara Badiola, Itziar Aizpuru eta Patxi Santamaria.