Ahobizi eta Belarriprestez gain, Ariguneak izango dira Euskaraldiaren aurtengo erronka. Azaroaren 20tik abenduaren 4ra izango da nazio ariketa, eta Aiaraldeko Euskalgintza Kontseiluko kideak burubelarri ari dira Euskaraldiko Batzordeak eratzen dagoeneko.
Barne eta kanpo ariguneak nobedade
Gaur, esaterako, Laudion aurkezpena egin dute elkarteentzat. Hala, elkarte eta tokiko talde, komertzio zein enpresei arigune bilakatzeko gonbita luzatu diete. Barne ariguneak eta kanpo ariguneak egongo dira aurtengo dinamikan. Barne ariguneetan ohiko funtzionamendurako taldeak kokatu dituzte (lan-taldeak, asanbladak, kirol edo kultur taldeak eta abar), eta bertako kide guztiek euskara ulertzeaz gain, taldearen %80 egon beharko da prest Ahobizi edo Belarriprest modura ariketan parte hartzeko. Kanpo Ariguneetan, aldiz, herritarrekiko harremanak euskaraz egiteko modua bermatu beharko da, espazio horietan beti ziurtatu beharko da Ahobizi edo Belarriprest bat dagoela gutxienez.
Ariguneen izen-ematerako azken eguna irailaren 27a izango da. Gerora iritsiko da Ahobizi zein Belarriprest gisa aritzeko txanda. Euskaraldiko Batzordeko kideek aurkezpenean adierazi dutenez, 16 urtetik gorakoak soilik apuntatu ahalko dira, eta beharrezkoa izango da www.euskaraldia.eus atarian erregistratzea.
Euskaraldiak dirauen bitartean -azaroaren 20tik abenduaren 4ra- txapak edo identifikagarriak banatuko dira. Tokian toki zehaztuko dira euskarrien entrega zitak.