Berez, bi obra uztartu dituzte. Alde batetik, anbulatorioko ibilgailuentzako bide berria inauguratu du Udalak, anbulantziek oinezkoen pasabidea moztu gabe aparkatzeko aukera izan dezaten. 27.992 euro bideratu dituzte horretara. Arabako Foru Aldundiak finantzatutako obra txikien programatik eskuratu dute dirua, agerraldian adierazi dutenez.
Osakidetzak, bere aldetik, 70 metro koadroko azaleradun azpiegitura atondu du, hainbat etxolez osatutakoa. PCR probak egiteko eta COVID-19a duten edo izan dezaketen pertsonak artatzeko baliatuko dute espazioa, Guajardok jakinarazi duenez. Udalak ere lagundu du obran: eremua urbanizatzen, saneamendua jartzen eta lorezaintza lanak egiten. Beste 5.000 euro baliatu ditu tokiko erakundeak horretara.
Eremuahainbat gunetan banatuta dago: itxarongela eta komun bana, PCR probak egiteko 2 gela eta 3 kontsulta. Amurrioko osasun zentroan ere egokitu dute horrelako azpiegitura bat.
Datorren astetik aurrera bertan egingo dira koronabirusa detektatzeko probak bertan, osasun zentroaren barrura sartu gabe. Modu horretan, COVID-19a izan dezaketen eta gaixotasun hori ez dutenen arteko bereizketa egin ahalko da.
Giza baliabideen inguruan galdetuta, Guajardok argitu du dauden kasu kopuruaren arabera langile gehiago edo gutxiago arituko direla lanean.
Amurrion ere
Hala ere, Amurrion horrelako espazio baten beharra ez da Laudion bezain handia, Osakidetzako arduradunak zehaztu duenez: "Amurrioko zentroa berriagoa da eta ez du horrenbesteko espazio arazorik".