Prentsaurrekoa eskaini du gaur Laudioko EH Bilduko udal taldeak. Izan ere, atzoko udalbatzan onartu zen aho batez lan istripuei buruzko protokoloa. "EH Bilduren ekimena izan da protokolo hori osatzea. Gogoratu nahi dugu otsailaren 24an Laudioko Udal Osoko Bilkura egiten ari ginen bitartean, langile batek istripua izan zuela Zorroza Gestión de Residuos enpresan. Gu udalbatza aretoan geunden bitartean, enpresako arduradunak istripua estaltzen saiatzen ari ziren".
Aintzat hartuta aurrekari horiek eta hilabete gutxiren buruan 4 langile hil zirela Laudion zein ingurutan, EH Bilduk proposatu zuen lan istripuei erantzuteko protokoloa adostea, "Laudioko Udalak ahalik eta lasterren erantzun diezaien lan istripu larriei".
Atzo onartuta
Koalizioak gaineratu du bere proposamena lantzeko 7 hilabete behar izan dituela Udal Gobernu Taldeak. Jose Mari Gutierrez EH Bilduko zinegotziaren aburuz, hilabete horiek tarte luzeegia dira eta hori ezin zaio COVID-19ari leporatu.
Gutierrezen aburuz, EH Bilduk nahiago lukeen langileen alde lerrokatuko litzatekeen protokoloa: "ezin da istripua pairatzen duena horren arduradun bilakatu. Gure proposamena zen informazio erreferentzia langileetatik hurbilen dagoen iturria izatea. Hau da, sindikatuak edo enpresa batzordea".
Hala ere, aho batez onartu denez, pozik agertu da koalizioa. "Espero dugu indarrean sartzeko beharrik ez izatea inoiz", gaineratu du zinegotziak.