Prentsa oharra plazaratu du Omniak iragan asteleheneko Udal Osoko Bilkuran jazotako gertakari bat dela eta. Alderdi laudioarrak mozioa aurkeztu zuen udalbatzan, “Laudio garbia” aldarrikatzeko. Izan ere, talde politiko horretako kideen ustez, udalak “ezer gutxi” egin du alor horretan legealdiko lehen urtean.
Horren aurrean, udal gobernua “betikoa” egitera mugatu zen, Omniaren aburuz: “mozioa alternatiboa aurkeztea eta duen gehiengoa baliatzea hori inposatzeko. Hain ohituak daude modu horretan funtzionatzera ez ziotela gure idazkiari behar bezala erreparatu”. Izan ere, opozisioko taldeak aurkeztu zuten mozioa “EAJk aurreko legealdian aurkeztutako beste baten kopia” zen.
Gauzak hala, Omniako kideen aburuz, argi geratu da zein den udal gobernuak duen funtzionatzeko modua. Opozisioko taldeak isilarazi nahi izatea leporatu diete EAJ eta PSE-EEri.
Horrez gain, gertatutakoak beste gauza bat frogatzen duela ere nabarmendu dute: “EAJk oposizioan dagoenean gauza bat esaten duela eta gobernuan dagoenean, aldiz, beste bat”.
Izan ere, EAJk 2015ean aurkeztutako mozioak udalean jartzen zuen herrian dauden pintaketak ezabatzeko ardura. Astelehenean aurkeztutako mozio alternatiboan, ordea, “eraikin pribatuen jabeengan” jarri zuten EAJk eta PSE-EEk erantzunkizuna, Omniaren ustez.
Alderdiko kideek onartu dute udal gobernuak diru partida batzuk zehaztu dituela aurrekontuetan garbiketa zereginetarako, baina ekintza horiek “berandu” datozela gaineratu dute.