Laudioko Udal Euskaltegia itxi dute, COVID-19 kasuak agertu direlako. Hala jakinarazi du udalak, eta azaldu du prebentzio neurri gisa hartu dutela erabakia. Tokiko erakundearen arabera, azpiegiturak hainbat egunez egongo dira itxita, “osasun langileen arakatze-prozesu osoa egin arte”. Osakidetzarekin ere jarri dira harremanetan, “esku-hartze gehigarririk egin behar den” jakiteko.
Hiru positibo, baina egoera larririk ez
Hiru pertsona dira PCR probetan positibo eman dutenak: 2 ikasle eta irakasle bat, denak talde berekoak. Hala ere, hirurak ondo daudela ziurtatu dute Euskaltegiko kideek, “sintomarik gabekoak dira edo sintoma arinak dituzte”.
Irakasleek nabarmendu dute ez dituztela klaseak etengo: telematikoki arituko dira aurrerantzean. “Bideo-deiak baliatzen ditugu klaseak emateko, eta ikas materiala bidaltzen diegu ikasleei”. Eskola presentzialak eta Internet bidezkoak uztartu dituzte udal euskaltegiko kideek ikasturte honetan. “A1, A2 eta B1 mailako ikasleekin klase guztiak eman ditugu aurrez aurre, euskara maila baxuena duten ikasleak direlako”, azaldu dute, “B2 eta C1ekoekin, aldiz, txandaka aritu gara: egun batean online aritu gara, eta bestean formatu presentzialean”.
Orain arte klase presentzialak eta online bidezkoak uztartu dituzte Euskaltegian
Modu horretan, distantzia soziala mantendu nahi izan dute. “Bestelako neurriak ere jarri ditugu: tenperatura hartzen dugu klasera sartu baino lehen eta gel hidroalkoholikoa ere baliatzen dugu”. Leihoak zabalik ematen dituzte klaseak, aire korrontea bermatzeko, baina, hala ere, ez dute koronabirus kasuak agertzea ekiditerik izan.
Neurri prebentiboa
Irakasleek azpimarratu dute neurri hau prebentzioagatik hartu dela. “Gure asmoa da behin egoera bideratuta orain arteko formatura itzultzea, klase telematikoak eta presentzialak konbinatuta”.
Ikasturte honetan 170 ikasle inguru daude matrikulatuta udal euskaltegian, gehienak B2 eta C1 mailetan. Pandemiak pandemia, euskaltegiak ez du bere jarduna bertan behera utzi. “Martxoan klase telematikoak ematera pasa ginen. Zaila izan zen, baina orain prestatuago gaude egoerari aurre egiteko”.