Omniak oharra plazaratu du eskualdeko herriak Arabako Urbide ur-partzuergora batzeko hartutako erabakiaren gaineko kezkak adierazteko. Omniaren esanetan, 9 urteko ibilbidean Laudioko Udalean jorratu den gairik garrantzitsuena izan da ur-partzuergoaren gaineko eztabaida eta oso kritiko azaldu da EAJk, PSEk eta Arabako Foru Aldundiak hartutako erabakiarekin.
Kantauriko Urkidetzaren disoluzioak Laudio uraren kudeaketaren gaineko inolako eskumenik gabe uzten duela salatu dute. Gainera, ur-partzuergo berrian Laudiok izango duen ordezkaritza asko murriztuko da, udal taldearen arabera: "Kantauriko Urkidetza ur-partzuergoan %5eko ordezkaritza du Aldundiak, Laudiok, berriz, %45koa, partzuergo berrian Arabako Foru Aldundiak %33ko ordezkaritza izango du eta Laudiok, aldiz, gutxiengo ordezkaritza".
Halaber, alderdi laudioarrak gogor kritikatu du azken urteetan Arabako udalerri bakar baten urak ere kudeatu ez dituen Urbide partzuergoan milioi bat euro baino gehiago inbertitu izana.
Informazio falta
Horrez gain, CAKUren disoluzioaren inguruan egondako gardentasun falta salatu du Omniak. Azaldu dutenez, partzuergoaren asanbladako kideek ez zekiten erakundea disolbatzeko lanak abian zeudela. Diputazioa "xantaia" egiten ari da, Omniaren iritziz: "Laudio erakundera batu ezean bere kabuz kudeatu beharko luke araztegia eta horrek tasak bost aldiz biderkatzea ekarriko luke".
Ezohiko batzarra
Bihar, abenduak 10, Kantauriko Urkidetzaren etorkizuna ebazteko ezohiko batzarra egingo dute. Omnia tokiko kudeaketa baten aldeko apustuan berretsi da, Laudioko arro hidrografikoaren berezitasunak eta ezaugarriak kontuan hartuko dituena.
