"Laudioko Udalak ez du Mugimendu Feministari espaziorik uzteko asmorik". Hala adierazi du eragile feministak, agerraldi baten bidez. Oparotzat dute feminismoak herrian egindako bidea: "Behetik, lan boluntarioz eta gure arteko elkarlan eta zaintzaren bitartez indartu da mugimendua". Horren adierazletzat hartu dituzte martxoaren 8ko ekimenak edota urtean zehar eginiko beste zenbait deialdi.
Dena den, Laudioko Udalaren aldetik babes eza izan da nagusi, kolektiboaren ustetan: "Instituzioek egiten duten lanez gain, jasaten ditugun erasoei erantzuteko mugimendu indartsu eta parte hartzaile baten beharra dago. Biak ala biak direlako beharrezko eta aldi berean osagarri; administrazioak eta mugimendua, paper ezberdina betetzen baitugu borroka feministan".
Alabaina, 2 urte daramatzate saretu eta antolatzeko espazioa eskatzen, "eta etengabe ukatu zaigu eragile gisa lokal bat edukitzea. Mugimendu Feminista eta udal gobernuaren azkeneko hartu emanean gure lana beharrezkoa ez dela esan zitzaigun, instituzioek gaitasuna baitute jada emakumeon* behar guztiak asetzeko zein herri feminista bermatzeko".
Mugimendu Feministak gogor kritikatu du tokiko erakundearen jarrera, euren lana ahantzi gabe: "Nahiz eta berdintasun sailak bere lana egin, honek ez du tresna ezta baliabide nahikorik benetako parekidetasuna bermatzeko gure herrian. Emakume eta gorputz disidenteen egoera zaildu egin da eta honen aurrean erantzun bat zor zaigu, 'pazientzia' eskatzetik harago doana".
Mugimendu Feministaren aburuz, ezin zaie leporatu irtenbideak bilatu ez izana: "Denari aurre egiten saiatu gara, baina Laudion espazio egonkorra behar dugu Mugimendu Feminista mamitzen jarraitzeko. Ulertu dugu, ordea, erantzuna: Laudioko Udalak ez du Mugimendu Feministari aurrera egiteko espazio bat errazteko asmorik".
Horregatik, aurrerantzean ere, feminismoa hedatzen jarraitzeko asmoa berretsi dute: "Gure indar eta konbikzioz jarraituko dugu borroka herritik, feministontzat eta feministon artean egiten. Onartuko ez duguna da, baina, udal feminista dugula esatea".