Omnia ere lerrokatu da Kultur Etxea 2023. urtera arte ixtearen erabakiaren aurka. Laudioko kultura "hari batetik zintzilik" dagoela uste dute alderdiko kideek. Euren iritziz, Kultur Etxearen birgaitze lanek agerian utzi dute herrian azpiegitura erabilgarrien gabezia, eta horren erantzukizuna herrian gobernatzen egon diren taldeena da, urtetan zehar pilatu egin direlako obrak behar dituzten eraikin publikoak. "Argi geratu da, batzuentzat zein besteentzat, udal eraikinak egoera onean izatea ez dela lehentasuna izan; eta, orain, pandemia baten erdian, gabeziak agerian geratu dira".
Omniaren hitzetan, beharrezkoa da COVID-19aren aurkako neurriak hartzea, baina horrek ez du kultur jarduera guztiak gelditzea ekarri behar. Oposizioko taldeak iradoki du udal-gobernurentzat oso aproposa izan daitekeela Kultur etxe berritua 2023. urtean inauguratzea, baina gaineratu du kaltea nabarmena izan daitekeela erabiltzaileentzat.
Horregatik, obren bigarren fasea zatika egitea proposatu dute, Kultur Etxearen guneak atondu heinean ireki daitezen.
Espazio hori Laudioko kulturaren "erdigunea" dela nabarmendu dute. Horregatik, gobernu-taldearen eta Aldundiaren mugimenduei "adi" egongo direla ohartarazi dute, elkarteen beharrak betetzea bermatzeko.