LAB sindikatuak oharra plazaratu du “Hezkuntza Saileko sukaldari eta garbitzaileen kolektiboan egondako lan-istripu larria salatzeko”. Laudioko Latiorro Ikastetxean jazo zen ezbeharra ostiralean. Behargin batek bihotzekoa izan zuen eta larri dago, sindikatuak jakinarazi duenez.
Langileari “elkartasuna eta babesa” helarazi diete sindikatuko kideek, eta ohartarazi dute asteburuan beste lan-istripu bat egon zela Derioko GUFEko egoitza batean, “non langilea bihotzekoak jota hil egin den”.
Gaixotasun profesionalen agerpena
LABek azpimarratu duenez, sukaldari eta garbitzaileen kolektiboko langileen %68 behin-behinekoa da, eta euren lan baldintzak okertu egin dira: “Langileek ez dituzte haien funtzioak zehaztuta, ordezkapenak ez dira betetzen, ratioak kontuan izanda laguntza kontratuak ez dira izendatzen, eta COVID-19ko errefortzuak ez dira kontratatzen hainbat ikastetxeetan, lan-zama gero eta handiago da...”.
Latiorroko kasua, "esanguratsua"
Latiorro Ikastetxeko kasua bereziki esanguratsua dela adierazi diote sindikatuko kideek Aiaraldea Hedabideari. Ikasturte berria hasi zenetik "lan karga izugarriak" eduki dituzte eskola horretan, COVID-19aren aurkako protokoloak betetzeko giza baliabide nahiko ez zeudelako. Irailean, esaterako, jantoki zerbitzurik gabe utzi behar izan zituzten ikasle gehienak, "talde-burbuilak" mantentzeko langile nahiko ez zeudea eta. Guraso eta irakasle ugarik protesta egin zuten orduan eta, azkenean, Eusko Jaurlaritzak begirale gehiago bideratu zituen hezkuntza zentrora, baina ez eskatutako guztiak.
Horregatik, LABek nabarmendu du ez dela kasualitatea behargin batek bihotzekoa pairatzea. Aipatutako lan baldintzen ondorioz, azken urteetan sektore horretan hainbat gaixotasun profesional agertu eta zenbait lan istripu gertatu dira euruen iritziz, eta “lanpostu arriskutsuak” direla ondorioztatu dute. “LABek kolektibo honen lanpostu guztien balorazioa eskatzen du, arriskuak ezagutu eta aztertu daitezen; eta langileen osasun zaintza berma dezatela exijitzen du. Negoziazio kolektibo zintzo baten bidez arazoa ondo bideratu daiteke, langile guztientzat irtenbide egokia bilatuz. Kontsolidazio prozesuak behar dira, eta egiteko lege propioa behar da, salbuespen egoera bati salbuespeneko neurriekin erantzunez”.