Omniak oharra plazaratu du udal gobernuak oposizioko alderdiekin duen jarrera salatzeko. Talde politikoaren iritziz, "EAJ eta PSE-EEren koalizioa udal gobernura iritsi zenetik gainerako taldeak ikusle huts izatera igaro dira".
Iragan asteleheneko -otsailak 22- udalbatzan gertatutakoak piztu du Omniaren haserrea. "EAJk eta PSE EEk Laudion ezarri nahiko luketen estatu totalitarioaren adibidea ikusi genuen bertan", azaldu dute oharrean.
Omniak aurkeztutako bi mozioen harira sortu zen polemika: Herriko Plazako zoladuraren ingurukoa bata eta haurren parkeak estaltzearen ingurukoa bestea. Omniaren esanetan, udal gobernuko ordezkariek mespretxuz erantzun zioten mozioen aurkezpenari, udalbatza horiek eztabaidatzeko lekua ez zela esanez. "Gu iraintzea besterik ez zitzaien falta", gaineratu dute oharrean.
Nabarmendu dute Juanje Merchan eta Ander Larrinaga izan zirela udal gobernuaren posizio horiek defendatzeaz arduratu zirenak: "Politikan hasi berriak dira, eta gu hamar urte baino gehiago daramagu udalaren egunerokoan murgilduta".
Udalbatza eta batzordeak bereiztearen beharra azpimarratu dute Omniako kideek: "Lehenengoa foro politikoa da, bigarrena foro teknikoa. Bata ez da bestearen ordezkoa". Izan ere, aurkeztutako mozioak Hirigintza Batzordera zuzenean eramateko eskatu zuten udal gobernuko kideek.