Pili Arsuaga eta Fontso Isasiren senideen mina aitortu du Laudioko Udalbatzak

Etxeratek 2020ko uztailean Pili eta Fontsoren omenez egindako ekitaldia. / Aiaraldea.eus

Etxerat elkarteak aurkeztutako mozioaren alde egin du Udal Osoko Bilkurak, EAJ, EH Bildu eta Omniaren botoei esker.

Pili Arsuaga eta Fontso Isasi 1980. urteko uztailaren 1ean hil ziren Zamoran, Ourenseko espetxean Maribi Ramila euskal preso politikoa bisitatzera zihoazenean. Istripu hartatik 30 urte igaro direnean, Etxerat elkarteak mozioa aurkeztu du Laudioko Udalean, Arsuaga eta Isasiren senideek jasandako mina aitortua izan dadin, eta dispertsio politika bertan behera uztea eskatuz.

Atzoko udalbatzan eztabaidatu zuten udaleko talde politikoek Etxerat elkartearen testua. EAJ, EH Bildu eta Omnia alderdiek honen alde egin zuten, PSE-EE alderdiak, berriz, aurka bozkatu zuen.

Dispertsio politika ezbaian

Mozioak eztabaida ekarri zuen udal taldeen artean. Juanje Merchan PSE-EEko zinegotziak ontzat jo zituen dispertsio politika eta gaur gaurkoz indarrean dagoen espetxe politika: "presoek ez dituzte legediaz kanpoko inolako onurarik jasoko". Gainerako udal taldeetako ordezkariek, ordea, dispertsio politikaren aurka azaldu ziren, "salbuespenezko" legedia dela ulertuta.

"Espetxe arautegiak ez du dispertsio politika barnebiltzen, eta hemen defendatzen ari garena legediaren aplikazio zorrotza baino ez da", argudiatu zuen Ander Añibarrok, testuaren defentsan. "Pili eta Fontsoren heriotza tragedia bat izan zen, senide eta lagunek pairatu duten tragedia onartezina", gaineratu zuen alkateak.

Omniak ere euskal presoek pairatzen duten dispertsioarekin amaitzea eskatu zuen: "Duela 10 urte desagertu zen ETA, sakabanaketak ez du inolako zentzurik". EH Bilduk ere bide berdinetik jo zuen: "Dispertsio politika ilegala izan zen eta ilegala da, eta 16 biktima ekarri ditu".

Pili eta Fontso gogoan

Pili Arsuaga eta Fontso Isasiren memoriaren alde urrats berri bat eman zen atzo Laudion, Udalbatzak senideek jasandako mina aitortuta. 30 urte hauetan hainbat ekimen egin dira bi herrikideak oroitzeko. 2020ko uztailean izan zen azkena, Etxeratek antolatutako ekitaldian.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide