Maiatzaren 15ean ekimen bateratua egin zuten Laudioko Musika Bandak, Orbeko Etxeak, Gaztetxeak, Sorginlarrenek, Kirikiñok eta skate taldeak Lamuza parkean, Laudioko kultura “alerta gorrian” dagoela salatzeko. Hainbat jarduera antolatu zituzten parkean barrena, herriko kultura bizitza erabat murriztu dela salatzeko. Ekitaldiak antolatzeko udalak jarritako trabak jarri zituzten mahai gainean, besteak beste.
Hilabetea baino gehiago igaro da ekimen sinboliko horretatik, baina antolatzaileak ez dira geldirik egon. Elkarren artean biltzen jarraitu dute, parkeko egitasmoan plazaratutako aldarriak zabaltzen jarraitzeko helburuarekin.
Horri begira egingo dute bigarren ekintza publikoa iragarri dute jadanik: Kultur-sorkuntza azoka. Uztailaren 11n egingo dute, 10:30etatik 13:30etara, Aldai plazan.
Bertan parte hartzeko beharrezkoa izango da aurretik izena ematea, izenemateakirikino@gmail.com helbidera mezua bidalita edo 688 72 66 65 telefonora deituta. Kultura sortzaileekin harremana egitea izango da ekimenaren helburua, maiatzaren 14an plazaratutako aldarrikapenak jendarteratzen jarraitzeko.
Batzar irekiak
Laudioko eragile eta norbanako orori luzatu diote herriko kulturaren aldeko mugimendu jaioberri honetan parte hartzeko gonbita. “Ezagunak ditugu eragile eta norbanakoei zabaltzen diegu batzarretara bertaratzeko deia, baina jende ororentzat daude zabalik”, nabarmendu dute.