Josu Hernandez laudioarra Classic Bodybuilding diziplinako txapeldun berria da. Perugian -Italia- erabaki da asteburuan titulua eta 175 zentimetrora arteko kategorian gailendu da kirolaria.
Horretara heltzeko, edonola ere, bide luzea egin izan behar du eta podium ugari zapaldu ditu aurretik. Finalerdietara heldu zen Marbellako IFBB Classic Physique trofeoan, 3. postuak lortu zituen Espainiako IFBB Classic Bodybuilding Kopan eta Classic Physique Kopan, 2. izan zen Arevalon lehiatutako Estatu Espainiarreko Iparraldeko Classic Physique txapelketan eta onena izan zen Espainiako WABBA Classic Bodybuilding Txapelketan.
Azken norgehiagoka horretan izandako garaipenari esker hautatua izan zen munduko WABBA txapelketan aritzeko, Classic Bodybuilding kategorian, 175 zentimetrora artekoa, hain zuzen. Horrez gain, beka jaso zuen.
Josu Hernandez lehiaketetara itzuli da 2021ean, 2019an atsedenaldia hartu ostean, eta Aiaraldea Hedabideari ziurtatu dio ezin dela alaiagoa egon: “Oso gogor lan egin ondoren eta asko borrokatu eta gero munduko txapeldunaren domina ekarri dut etxera!”.
Kirol mota hori oso ezaguna ez bada ere, Aiaraldean hainbat lagunek (Iñaki Martinezek, Raul Gastonek, Unai Solaunek, Ernesto Dominguezek edo Carlos Pinok, besteak beste) praktikatu dute eta domina ugari irabazi dituzte.