Emanaldi berezia izan zen, baina ez horrenbeste jotako piezen nolakotasunagatik, emanaldia egite hutsagatik baizik. Izan ere, musika bandak iaztik zeraman kontzerturik eman gabe, COVID-19a dela eta ezarritako neurriengatik. Bandako kideek behin baino gehiagotan salatu dute eurei ezarri zaizkien neurriak gehiegizkoak direla.
Laudioko Udalaren KultUda egitarauaren barruan eskaini zuten emanaldia, koronabirusaren aurkako neurri guztiak beteta.
Balorazioa
Oso positiboki baloratu dute emanaldiak izandako harrera. “Bandako kideen jarrera, ardura eta profesionaltasuna nabarmendu nahiko nituzke, elkartu gabe ia bi urte daramatzagun arren”, adierazi du Pedro Ignacio Adrián Gonzálezek, “nabari zen herriko jendeak banda berriz entzuteko gogoa zuela, eta musikariok berriz jotzekoa”.
Bandako zuzendariak nabarmendu du musikari askok euren oporrak eten behar izan dituztela kontzertua eskaini ahal izateko, eta beste modu batera funtzionatzeko beharra jarri du mahai gainean: “Musika banda batek, dituen ezaugarriak direla eta, egonkortasuna eta jarraipena behar ditu bere jarduna garatzeko”.
Horri begira, hiru ardatz garatu behar direla aipatu du Adrián Gonzálezek, “lehen bait lehen”:
- Pandemia aurretik egiten ziren ekintza guztiak berrezartzea.
- Udalarekin hitzarmen bat sinatzea, “bandaren etorkizuna bermatzeko”.
- Udal Musika Eskola martxan jartzea aztertzea.
Laudioko kulturaren alde lan egiten duen jendeari “errespetua” zor zaiola nabarmendu du zuzendariak eta gaineratu du kontzertuak egiteko toki aproposak bermatu behar direla, Alberto Acero plaza horretarako gune egokia ez dela iritzita. “Pena da musikariek entseguetan egindako lana behar bezala ez entzutea”. Gauzak hala, Aldai plaza gune egokiagoa dela uste du musikariak.
Bukatzeko, bandako arduradunak eskerrak eman nahi izan die laguntza eta babesa helarazi dieten pertsona guztiei. “Hori da gure jardunarekin jarraitzeko dugun gasolinarik onena”.