Bizkotxo lehiaketa eta umeentzako jokoak egin dituzte gaur arratsaldean. Bihar, aldiz, Tute Txapelketa egongo da 16:30ean, Ugarte Tabernan. 20:00etan, aldiz, Iglea Txapelketa egongo da, Gorbea tabernan. Horrez gain, trikitilariak egongo dira kalean egunean zehar, auzoa girotzen.
Igandean, aldiz, mendi ibilaldia egingo dute Ermualdera, 9:30ean Ugarteko plazatik abiatuta. 16:30ean mus txapelketa egongo da Gorbea tabernan, eta baita odoloste jana ere, auzoko tabernetan.
Ekintza horiei udalak biharko (larunbata) antolatutako jarduerak gehitu behar zaizkio: Bi Hotsak abesbatzaren kontzertua (12:30ean parrokian) eta Arrizkuzubi herri kirol taldeak erakustaldia egingo du 18:00etan. Pinotxo ikuskizuna ere eskainiko zuten auzoan, baina tokiz aldatu dute azkenean: Aldai plazan ikusi ahalko da 20:00etan.
Tabernekin elkarlanean
Iazko ereduari jarraituz auzolanean antolatuko dute egitaraua 'Ugarte Bizirik' ekimen kulturalaren izenean.
Aurreko urtean egin bezala, auzoko komertzio eta ostalaritza establezimenduen inplikazioa eta elkarlana sustatu nahi izan dute. Jaien ordezko egitaraua "herritarren aktibaziorako tresna" izatea dute helburu ekimen kulturaleko kideek, 2019an Ugarteko jaien antolakuntzan gauzatutako belaunaldi aldaketari bidea errazteko helburuarekin.
Izan ere, urte horretako jaietan gazte ugari elkartu ziren jai herrikoiak antolatzeko premia ikusirik. Urte luzez Ugarten desagertuta zegoen jai eredu herrikoi eta parte-hartzailea berreskuratzea zuten helburu, eta baita lortu ere. Jaiak auzora gehiago bideratzea eta gazteei begirako eskaintza handitzea ziren antolatzeko urratsa eman zuten gazteen helburu nagusiak.
Lehenengo urte horretan gauza gutxi aldatzeko aukera izan zuten, denboraz larri ibili baitziren. Baina, zailtasunak zailtasun, egitarauari buelta bat ematea lortu zuten eta oso harrera ona izan zuen jaien eskaintza berriak. “Jendea oso pozik aritu zen, eta bizilagun ugarik esan ziguten gau partean aspaldi ez zela Ugartera horrenbeste jende gerturatzen”.
Gauzak hala, aldaketa horretan sakontzen jarraitzeko asmoa zuten hurrengo urteetan, baina pandemiak moteldu egin du prozesu hori guztia. Horregatik espero dute aurten osatuko den eskaintza kulturala nahikoa izatea belaunaldi aldaketa eta aktibazio horri eusteko.
Argazkiak: Kirikiño Atseden Taldea