Hilabete bat pasa da Laudioko Udalak hiltegia itxi zuenetik, hondakinen kudeaketa eta tratamenduan akatsak detektatu zituela argudiatuta. Erabaki horren aurkako elkarretaratzea egin dute gaur Gurutze Gorriaren parean. Hasierako asmoa manifestazioa egitea zen Herriko plazaraino, baina azkenean asanblada informatiboa egitera mugatu dira. Hala ere, datorren astean beste deialdiren bat egitea aurreikusi dute.
Laudioko hiltegiaren eredua goraipatu dute asanbladan, “kilometro 0” filosofia modu hobezinean betetzen duela nabarmenduta. “Produktuak abeltzainetik harakinera pasatzen dira, handizkako merkataririk edota bitartekaririk gabe”.
Gogorarazi dutenez, eskualdeko familia asko bizi dira sektore horri esker, eta Aiaraldea eta Enkarterriak dira EAEn abeltzaintza dentsitate handiena duten zonaldeak. Laudioko hiltegia itxita, 70 kilometrora dute hurbilena, “eta abereak horraino garraiatzea ez da jasangarria”. Gauzak hala, hiltegirik gabe tokiko haragirik egongo ez dela ondorioztatu dute.
Itxieraren atzean “interes ezkutuak” egon daitezkeela iradoki dute gainera, hiltegiko azpiegiturek araudi guztiak betetzen dituztela gaineratuta. “Isurketa guztiak kolektore orokorrera doaz, gainontzeko fabrika eta bizilagunen isurketak bezala. Gainera, hiltegiko hondakinak organikoak dira, hau da, gutxien kutsatzen dutenak”.
Bukatzeko, itxierak zenbat pertsonari eragingo dien kalkulatu dute, iazko urritik ekainera bitarteko datuak baliatuta:
- 4.500 abeltzaini (Arabako 696 tartean).
- 287 harategi eta bezero baino gehiagori.
- Hiltegian lan egiten duten 11 langileei.
Horrez gain, denbora tarte horretan hiltegian 2.439 behi, 3.510 arkume eta 1.472 antxume sakrifikatu dira, aipatu dutenez.
Argazkiak: Samuel Pasandin Sanchez