Hajime Kirol Klubak modu indartsuan abiatu du denboraldia eta taldeko bost borrokalarik ringa zapalduko dute laster. Lehenengoa Bilall Ben Yechou gaztea izango da hurrengo igandean, Errenteria Top Fighters ikuskizunean.
Hasiera batean, Ben Yechouk ez zuen parte hartu behar hitzorduan, MMA borrokaldia izango baita. Baina bere aurkariaren arerioak lesioa izan ostean, laudioarrak bete du hutsunea eta K1 kirolean lehiatuko dira biak. Ben Yechouk borroka bakarra dauka eta esperientzia gehiago duen Rangel Torres izango du aurrean, 90 kilo azpiko kategorian. Aipatzekoa da Errenteriako borroka garrantzitsuena Aratz Garmendiarena izango dela. Garmendia ez da jadanik bizi eskualdean, baina kirolean buru-belarri jarraitzen du. Izan ere, duela denbora gutxi Londresen aritu zen.
Bi emakume ringera
Azaroaren 20an Hajimeko bi kideren txanda helduko da Bilboko La Casilla pabilioian. K1 Slam ekitaldi ospetsuan izango da. Borrokaldi horretan Hego Euskal Herriko K1 kirolari famatuenek parte hartzen dute.
Profesionalek tokia hartu baino lehen, ordea, borroka amateurrak eskaintzen dira eta horietan egongo dira Leire Torres eta Idoia Arzuaga. Torresek bi aldiz zapaldu du ringa aurretik eta 50 kilo azpiko kategorian neurtzea adostu du.
Idoia Arzuagak, ordea, debuta egingo du. Bere aurrean eskarmentu gehiagoko kirolaria izango du, Aintzane Martin durangarra, hain zuzen.
Zarautzen beste bi kide
Astebete beranduago, azaroaren 27an, Zarautzen izango da hitzordua. Han ibiliko dira Brahim Salim eta Jorge Bengoa. Salim Laudiora heldu berri da eta Hajime klubera batu da, baina aurretik 9 aldiz borrokatu da ofizialki.
Jorge Bengoak 5 borrokako ibilbidea dauka eta Euskadiko K-1 Light diziplinako txapeldunordea izan zen Amorebietan iaz. 75 kilo azpiko kategorian izena eman du eta, berez, torneo batean parte hartuko du. 8 kirolarik txapeldunak izateko neurtuko dituzte euren indarrak, kanporaketa sistema jarraiki. Bengoak adierazi du bere aurkariek esperientzia gehiago dutela, baina bera oso kontzentraturik dagoela.