Indarrak batu dituzte Amurrioko EH Bildu eta Orain Amurrio talde politikoek Laudioko hiltegia itxita mantentzeko Laudioko Udal Gobernuak hartutako erabakia salatzeko. Egun bat lehenago Aiarako oposizioko udal taldeek egin bezala, hiltegiaren aferak eskualde osoari eragiten diola azaldu dute: "berehalako itxiera horren ondorioak ez dira Laudioko udalerrira mugatzen; aitzitik, eragin larria dute Amurrioko eta inguruko eskualdeetako udalerrietan".
Kaltetutako sektorearekin egondako elkarrizketa eza ere gogor kritikatu dute Amurrioko udal taldeek, eta, ondorioz, onartezintzat jo dute aldebakartasunez hartutako hiltegia ixteko erabakia. Gainera, azpiegituraren itxierak abeltzainek abereak distantzia handira garraiatu behar izatea eragingo duela nabarmendu dute: "horrek ondorio negatiboak izango ditu bai animalientzat, baita abeltzainen ekonomia prekarioentzat ere. Eragin hori are larriagoa da animalien garraioaren gainkostua onartu ezin duten familia-ustiategietan" azaldu dute EH Bilduk eta Orain Amurriok.
Zero kilometroko politikak
Laudioko Udal Gobernuaren erabakiak "zenbait talde politikok defendatzen omen duten zer kilometro politikatik" aldetzen dira, EH Bildu eta Orain Amurrioren iritziz, kalitate handiko produktuak banatzen dituzten familia eta ustiategiak arrisku larrian utziz.
Hori guztia dela eta, hartutako erabakia berriro aztertzea eskatu diote Ander Añibarrok gidatutako Udal Gobernuari, bai eta kaltetutako sektorearekin elkarrizketa abiatzea ere. Azkenik, iritzia publikoki aditzera ematea eskatu diote EAJri.