NOR talde antiespezistak positiboki baloratu du EAJ eta PSE taldeek osatutako Udal Gobernuak Laudioko hiltegia ixteko hartutako erabakia. Horrela adierazi du taldeak sare sozialetan zabaldutako ohar baten bidez. "Antiespezistak gara, eta animalien askapena dugu helburu. Guztiena. Eta horregatik dugu garbi hiltegirik gabeko etorkizuna dugula zain. Hori lortzeko ari gara lanean, irabazteko dugun gizarte ereduan zapalkuntzak ez duelako tokirik, inor ez delako inoren jabe", adierazi dute NOR talde antiespezistako kideek.
Desadostasunak plataforma herritarrarekin
Halaber, "etsigarritzat" jo dute eskualdeko baserritarrek, harakinek eta kontsumitzaileek hiltegiaren irekiera eskatzeko eratutako plataformaren sorrera. Talde antiespezista ez dator bat azpiegituraren berrezartzearekin, eta "animaliak hiltzeko esplotazio zentrotzat" jo du Laudioko hiltegia.
Eragile antiespezistaren ustez, "gizakiaz besteko animalien eskubideak bazterrean uzten dituen gizarte eredu baten barruan" ari dira defendatzen euren interesak eskualdeko abeltzainak; "kapitalismoak sustatzen dituen azpiegitura industrialak bazterrean utzi nahi dituzte, eredu ustez iraunkorrago baten alde".
Bide horretan, "Hiltegia Ez Itxi" plataformak kapitalismoari aurre egiteko beharra erdigunean jarri izanarekin bat datozela azaldu dute talde antiespezistako kideek, ez ordea animaliak hiltzea oinarri duen eredu batekin: "Antiespezistak gara, eta animalien askapena dugu helburu. Guztiona. Gizakiona eta gizakiz bertzekoena. Zapalkuntza ororen aurka ari garelako lanean, eta bidean, emantzipazio borroka guztien arteko elkarlana dugulako amets".
