Laudioko anbulategi berriaren proiektua hemendik “hilabete bat edo bira” jasotzea espero du udalak. Hala aurreratu zuen Ander Añibarro alkateak atzoko Udal Osoko Bilkuran. Latiorron eraikiko da azpiegitura, eta atzoko plenoan onartu zen eraikinaren kokalekuko lursailak Eusko Jaurlaritzako Osasun Sailari lagatzeko hitzarmena.
EAJk eta PSE-EEk bozkatu zuten proposamenaren alde. Oposizioko taldeak, ordea, aurka lerratu ziren. Omniaren ustez, “Eusko Jaurlaritzaren inposaketa” izan da osasun zentroaren proiektua, “inolako eztabaidarik gabe ezarri baita”. Alderdi laudioarraren iritziz, proiektu honekin “aukera bat galdu” da. “Eskualdeko anbulatorio bat izatea oso interesgarria izango litzateke, baina orain mahai gainean dagoen proiektuak ez luke etorkizunean hori egitea ahalbidetuko”, nabarmendu zuen Alvaro Barrios zinegotziak.
Antzeko iritzia plazaratu zuen EH Bilduk udalbatzan. Talde politikoari ez zaizkio egokiak iruditu anbulatorio berriaren aferan egondako “moduak eta erabakiak”. Aldebakarreko iritziak iritzi teknikoz mozorrotu direla salatu du koalizioak. “Proiektuaren aurkezpen mediatikoaren ostean egin zen lehenbiziko batzar informatiboa”, azpimarratu zuen Esti Gorostiaga zinegotziak, eta gaineratu zuen informazioa falta zela: “Aurkeztutako dokumentazioan 4. eranskin bati egiten zaio erreferentzia. Anbulatorioak eskainiko dituen zerbitzuei buruzkoa da eranskin hori, baina ez da inondik ageri”.
Anbulatorioaren proiektua inolako eztabaidarik gabe ezarri dela salatu dute oposizioko taldeek
Aurreko guztia kontuan hartuta, horrelako proiektu estrategiko batean eztabaida publikoa bermatu beharko litzatekeela aldarrikatu zuten oposizioko bi taldeek.
Ander Añibarroren erantzuna
Ander Añibarrok erantzun zien oposizioko taldeei. Alkatearen esanetan, ez da inolako inposaketarik egon proiektuan. “OSI Galdakao barrutiarekin elkarlanean aritu gara uneoro, Laudiorentzat zein eskualdearentzat horren beharrezkoa den azpiegitura hau eraiki ahal izateko”.
Ildo berean, erabakia "argudio teknikoekin mozorrotu izana" ukatu zuen gobernuburuak. “Argi hitz eginda beti. Kokaleku bat erabaki zen, eta batzar informatiboan eman ziren horri buruzko azalpen guztiak”. Añibarroren arabera, lursail publikoaren eskuragarritasuna edota beste kokaleku batzuek duten uholde-arriskua kontuan hartuta hautatu zen Latiorro osasun-azpiegitura berria kokatzeko.
Hala ere, Añibarrok aitortu zuen ez zuela proiektuaren gaineko informazio gehiagorik. “Aurreproiektu txiki bat ikusteko aukera izan dugu, hirigintzari lotutako hainbat afera tekniko bideratzen hasteko. Aurreproiektua iristen zaigunean dagokion batzordera eramango dugu, eta ez diegu talde politikoekin soilik aurkeztuko, herritarrei ere erakutsiko diegu”.
Plenoaren gainontzeko puntuak
Anbulatorioarena izan zen atzoko plenoan eztabaida gehien eragin zuen puntua. Gainontzeko gaietan adostasuna izan zen nagusi. Gardetasunerako eta Parte hartzerako Araudi berria onartu zen, besteak beste. EAJ, PSE-EE eta EH Bilduk bozkatu zuten horren alde. Omnia abstenitu egin zen bozketan, baina ez araudiarekin ados ez zegoelako, “etorkizunean urrunago joan” nahiko lukeelako baizik.
Hemen ikusi daiteke Udal Osoko Bilkura osorik:
