EGITARAU OSOA

Azokak eta aldarrikapenek bat egingo dute Dolumin Barikuan

Txabi Alvarado Bañares 2022ko api. 5a, 21:40
60 postu egongo dira guztira azokan. / Aiaraldea.eus

Laudioko Udalak egun osoko egitaraua antolatu du. Horrez gain, eguerdian mobilizazioa egongo da Aldai plazatik abiatuta, "SOS Aiaraldea" lemapean. 

Giro bizia aurreikusi daiteke ostiral honetarako Laudion. Bi urteko etenaldiaren ostean, Dolumin Barikua ospakizuna itzuliko da herrira, baina hainbat berezitasunekin. 

Aberedunak elkarteak uko egin zion ohiko abereen azoka antolatzeari, udal hiltegiaren itxieraren aurka protestatzeko. Gauzak hala, Udalaren gain geratu da egitarau osoaren koordinazioa. Egun osoko programa prestatu du tokiko erakundeak, goizetik gaueko ordu txikietara arte luzatuko dena. 

Euskal jaki eta artisau produktuen azokarekin hasiko da eguna. 60 postu egongo dira guztira, Aldai eta Herriko plazen artean banatuta, 9:30etik 14:30ak arte. 12:00etan herri kirolak egongo dira Aldai plazan, eta ordu berean abiatuko da Bidebietako trikitilarien kalejira, hiru orduz luzatuko dena. 

Arratsaldean, aldiz, umeentzako herri kirolak egongo dira Aldai plazan, 17:00etatik 19:00ak arte. Ordu horretan Nafarroako jotak egongo dira Herriko plazan. Ekin Joleak txistulari taldeak herriko kale nagusiak zeharkatuko ditu 20:00etatik 21:00etara, eta Santa Luzia abesbatzak kontzertua eskainiko du Done Petri elizan, 20:15ean. Akerbeltz erromeria arduratuko da eguna amaitzeaz. 23:00etatik 3:00etara eskainiko du kontzertua, Alberto Acero plazan. 

Idi probak

Idi probak ere egongo dira, 21:00etan udal probalekuan. Asteburu osoan zehar luzatuko da ekimena. Larunbatean 21:00etan jarraituko dute probekin, igandean 18:00etan eta astelehenean 21:00etan berriz. 

Mobilizazioa

Aldarrikapenek ere presentzia izango dute ostiralean, mobilizazioa deitu baitu Aiaraldeko Greba Batzordeak 'SOS Aiaraldea' lemapean. 12:30ean abiatuko dira Aldai plazatatik, eta hainbat sektore eta eragile batuko dira bertan: Hiltegia ez itxi! plataformako kideak, Madres Mercedariaseko grebalariak, Arabako Metaleko Sektoreko langileak edota Artiacheko langileak, besteak beste. 

Jendartea Laudio
Erlazionatuak
Egitarau osoa, hemen ikusgai

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide