Laudioko Udal hiltegia ixteko erabakia politikotzat jo du Arabako Batzar Nagusietako EH Bilduren batzarkide taldeak. Koalizio abertzalearen arabera, azpiegituraren itxierak "kinka larrian" utzi du, ez bakarrik abeltzaintza-sektorea, baita eskualde osoa ere. "Lurralde guztietatik animaliak hara sakrifikatzera eramaten zituztenak salduta utzi ditu hiltegiaren itxierak", adierazi du Eva Lopez de Arroyabe bozeramaileak.
Erabakia gardentasunik gabe hartu izana leporatu dio Lopez de Arroyabek Laudioko Udalari. Iragan ostiraleko Dolumin Barikura abeltzainek abereak eraman ez izana jarri du gardentasun falta horren adibide moduan: "Bai egin zena, ordea, manifestazio handi bat izan zen, sektoreak eskualdean duen funtsezko papera aldarrikatzeko eta aurrean duen egoera gero eta zailagoa dela salatzeko: alde batetik, kostuen igoera, eta bestetik, salmenta prezio baxuak".
Laudiokoa zen Araban zerbitzua eskaintzen zuen hiltegi bakarra, eta bere itxierak Aiaraldetik kanpo ere eragina duela azpimarratu du EH Bilduk: "tokiko abeltzain askorentzat egoera jasanezina bihurtzen ari da". Eusko Legebiltzarrean Aiaraldea ekonomikoki suspertzeko eztabaidaturiko ponentzian koalizio abertzaleak hiltegiaren bideragarritasuna aztertzeko beharra aldarrikatu zuela gogorarazi du Eva Lopez de Arroyabek. Ponentziaren azken testuak, ordea, ez du proposamena jasotzen, politikariak salatu duenez.
Gauzak hala, Arabako abeltzaintza-sektorearen eta administrazioaren artean sustatutako sakrifizio zerbitzu deszentralizatu eta publiko baten beharra aldarrikatu du EH Bilduk, "bertako elikagaien ekoizpena eta kontsumoa bermatzeko eta Arabako abeltzaintza sektorearen bideragarritasuna bermatzeko". Aiaraldeari dagokionez, nekazaritzako elikagaien poligono bat martxan jartzea proposatu du opozisioko talde politikoak.