Ehunka lagun batu dira gaur Laudion 'SOS Aiaraldea' lemapean eginiko mobilizazioan. Oso ekimen anitza izan da, hainbat sektore eta eragileetako bizilagunak batu direlako: Artiacheko grebalariak, baserritarrak, Madres Mercedariaseko langileak edota Arabako metaleko langileak, besteak beste.
Dolumin Barikuaren testuinguruan egin dute manifestazioa. Gauzak hala, abeltzainen aldarriek (udal hiltegiaren itxieraren aurka) protagonismo nabarmena izan dute. Baserritarrek bizi duten prekarietate egoera izan dute hizpide, besteak beste. “10 baserritarretatik 8k gutxieneko soldata baino gutxiago jasotzen dute astean 52 ordu lan eginda”, aipatu dute amaiera ekitaldian, besteak beste.
Baina mobilizazioa ez da horretara mugatu, langile-klasearen aldeko aldarri zabala plazaratu baitute bertaratutakoek. “Krisia, prekarietatea, pobrezia, deslokalizazioa, kaleratzeak, pribatizazioa, inbertsio-eza, lan-istripuak... Aiaraldean egoera guzti hauek, tamalez, normalizatu direla dirudi”, azaldu dute, “2008ko krisiaren ondorioak pairatzetik gentozen, pandemia iritsi zenean, eta oraintsuago Europan piztu den gerrak, sistema kapitalista eta patriarkal baten erasoaldia oldartu besterik ez du egin”.
Egoera “kolapsora” iristen ari dela salatu dute, “eta, beti bezala, langile-klasea da ondorioak gehien nabaritzen ari dena”.
Bizitzaren garestitzea izan dute hizpide, eta “shock doktrinatzat” jo dute gaur egungo egoera: “Gerraz, hornikuntza ezaz, pandemiaz…betetzen dituzte komunikabide guztiak; eta, bitartean, Valvospainen, Tubacexen eta beste hainbat enpresetan kaleratzen gaituzte. Edo prekarizatzen gaituzte, Artiachen, Arabako Metalean, Madres Mercedariasen, zahar egoitzetan, Osakidetzan edota supermerkatuetan. Merkataritzan eta ostalaritzan oztopoak jarri, eta Laudioko hiltegia ixten digute, besteak beste”.
Horren aurrean, “sareak ehuntzen” jarraitzeko deia luzatu dute, langile klaseko sektoreen artean. “Krisi honek hemendik aurrerako norabidea markatuko du, eta irtenbideak bi aurpegi izan ditzake: prekarizazioa edo eskubideen konkista”.