Enplegua Aldi Baterako Erregulatzeko Espedientea ezarri nahi dute Autoglasen, ekoizpen arrazoiengatik. Energiaren kostuan eta lehengaien prezioetan egondako gorakadak argudiatu ditu zuzendaritzak. “Ukrainako gerra eta gasaren prezioaren gorakada ere aipatu dizkigute arrazoi moduan”, azaldu diote iturri sindikalek Aiaraldea Komunikabideari.
Neurria urte amaierara arte luzatuko litzateke, enpresan dauden 240 langileei eragingo lieke eta jardunaldiaren %40ko murrizketa ekarriko luke. “Hala ere, espedientea asterik aste moldatuko litzateke, dauden eskarien arabera”.
Autoetako haizetakoak ekoizten ditu Autoglasek, eta bere produktuen prezioak igoko ditu, energiaren eta lehengaien kostuen handitzeari aurre egiteko. “Horren ondorioz, zenbait bezero galtzea espero du enpresak, merkatua egonkortu arte”. Espedientea kontsulta fasean dago une honetan.
Honakoa ez da hornigaien ondorioz eskualdean egon den lehen enplegu murrizketa. Iazko udazkenean (Ukrainako gerra oraindik hasi ez zenean) Enplegua Aldi Baterako Erregulatzeko Espedienteak ezarri zituzten Mubea eta Megatech enpresetan, mikrotxipen eskasia dela eta.