Dozenaka gazte batu ziren atzo Laudioko Gaztetxearen huste arriskua salatzeko eginiko agerraldian. Azken hilabete eta asteetan gertatutakoak azaldu zituzten gazte asanbladako kideek bertan. Parkeko obrak Gaztetxea hutseko “aitzakia” baino izan ez zirela nabarmendu zuten, beste behin ere. “Hauek bukatzean Udalak Gaztetxera bueltatuko ginela publikoki adierazi bazuen ere, hau gezurra zela agerian geratu da, Udalak ez baitu bere hitza bete”, salatu zuten, “are gehiago, Aldundiarekin batera Gaztetxerako erabilera berriak diseinatzen ari dira. Hau guztia, Parkeko eragileen interes eta beharrak kontuan hartu gabe”.
Horren aurrean, argi utzi zuten ez dutela Gaztetxea utziiko, “Gaztetxeak dituen baldintzak betetzen ez dituen beste edozein espaziogatik”.
Horrez gain, Gaztetxearen ateak ireki zituztenetik pairatutako “jazarpen poliziala” ere salatu zuten ekitaldian.
Bestalde, aipamena egin zieten Gaztetxetik igaro diren gazte belaunaldi guztiei: “Kide horien konpromiso eta lanari esker aurrera atera dira hamaika kontzertu, egitarau eta jardunaldi. Desalojoa horrekin guztiarekin amaitzera dator, Laudioko gazteok antolakuntzarako espazioak eduki ez ditzagun, gure interes eta beharren alde antola ez gaitezen”.
Huste agindua “okupazioaren aurkako ofentsibaren” barruan kokatu zuten, eta horri aurre egiteko deia luzatu zieten gazte eta herritar guztiei: “Konpromiso militanteak ekarri gaitu hona, eta horretan oinarrituko gara Laudioko Gaztetxea eraikitzen jarraitzeko”.