Gaztetxeko bi kide identifikatu eta isunekin mehatxatu dituzte gaur, "gaztetxean sartzeagatik". Hala salatu dute Gazte Asanbladako kideek sare sozialen bidez. "Bi kideak zamalanak egiten ari ziren gaztetxearen aurrean. Orduan agertu dira udaltzainak. Lehen identifikazioa autoa gaztetxe aurrean husteagatik izan da, baina bigarren pertsona gaztetxean sartzeagatik atzeman dute", azaldu dute.
Nabarmendu dutenez, poliziek esan diete debekatuta dagoela gaztetxean sartzea, eta isunekin mehatxatu dituzte, "nahiz eta horren gaineko prozedura judiziala oraindik irekita dagoen".
Gaztetxeko kideek salatu dute honakoa ez dela kasu isolatua. Gaztetxean berriz sartu zirenean hainbat kide indentifikatu zituzten poliziek. Horrez gain, 750 euroko isuna ezarri zien udalak udal garbiketa ordenantza baliatuta, Gaztetxearen atearen gainean "Gaztetxe" hitza marrazteagatik.
Agerraldia bihar
Iragan astean jakinarazi zuten Gaztetxeko kideek Udalak espazioaren hustearekin aurrera jarraitu nahi duela. Hori salatzeko agerraldia egingo dute bihar 18:30ean, gune autogestionatuan bertan. Herritar orori luzatu diote bertara eta jarraian egingo diren afari eta kontzertuetan parte hartzeko gonbita.
Gaztetxearen aurkako desalojo prozesua martxan jarri du Udalak, baina horrek ezin du gure jarduera eten. Gaztetxea defendatzeko garaia heldu da.
— Laudioko Gaztetxea (@LaudioGaztetxea) May 4, 2022
Gaztetxea gazte langileontzat! pic.twitter.com/YYNBWPXB75