Nerbioi ibaian uholdeen kontrako proiektua egitea hitzartu du Laudioko Udalak Ura Agentziarekin. Proiektuak 4,7 milioi euroko kostua izango du, eta lanek 17 hilabeteko iraupena izatea aurreikusi dute. Obraren % 100 URA Agentziak ordaindu du.
Nerbioi ibaiaren ibilgua sakonduko dute esku hartzean, eta hondoa metro bat beheratuko dute, uholdeak ekiditeko asmoz. Baias kalearen aldamenetik hasiko dute esku hartzea, San Juan errekak eta Nerbioi ibaiak bat egiten duten lekuan, hain zuzen ere. Gaur egun obrak egiten ari dira bertan, San Juan erreka uholdeengandik babesteko. Lanek Aretako bide zaharretara arte izango dute eragina, 1338 metro guztira, ibai tarte guzti hori uholdeengandik babesteko.
Proiektua onartuta dago honezkero eta lizitazioa abiatu berri dute. Ander Añibarro alkateak uste dut lanak abian egongo direla urte amaierarako.
1983ko uholdeen ostean ibaiaren ibilgua ahokatu egin zen, berriz gainezka egitea ekiditzeko. Garai hartan hartutako neurriak osatzera datoz oraingo obrak.
Bilera herritarrekin
Maiatzaren 17an, Laudioko Udalak eta URA Uraren Euskal Agentziak bilera egingo dute, 18:00etan Kultura Etxeko Arraño Aretoan eta herritarrei azalduko diete zer nolako eragin izango duten lanek. Izan ere, mikropiloteak instalatuko dituzte etxebizitzen inguruko ertzetan, lursaila sendotuko dela bermatzeko.