Lehen postua lortu zuen Olatz Caminok asteburuan Almerian, Espainiako Kopako proban, Junior kategorian. "Bi lasterketa egin genituen, eta oso biziak izan ziren biak", azaldu dio txirrindulari laudioarrak Aiaraldea Komunikabideari. Ziortza Ortizekin batera joan zen Almeriara, eta lehengo proban lortu zuen garaipena. "Oso gogorra izan zen, hiru portu igo behar izan baigenituen". 15 txirrindulari inguru abiatu ziren ihesaldian, eta Aiaraldeko kirolariak ondo kokatzea lortu zuen. Modu horretan lortu zuen lehena izatea malda goran zegoen meta zeharkatzen.
Hurrengo erronkak
Bigarren lasterketan, aldiz, ez zuen horrenbesteko arrakastarik izan, podiumenan sartzeko zorian egon zen arren. Gauzak hala, helburu argia du Caminok Kopako hurrengo hitzorduei begira: txapelketako liderra bilakatzea. "Badakit zaila dela, baina onena ematen saiatuko naiz".
Ekainean izango dira Espainiako Kopako hurrengo probak, Sueca (Valentzia), Estella eta Valladoliden. Baina, hori baino lehen, beste erronka handi bat izango du Caminok: Euskadiko Txapelketa. Azpeitian izango da norgehiagoka, eta laudioarraren helburua izango da iaz lortutako titulua defendatzea, lehen postua lortu baitzuen Larrinbeko Sari Nagusian.
Nazioartera begira ere dago txirrindularia. Espainiako Selekzioak deitzea espero du, Europako Txapelketara joateko.