II. SEÑORA SARIKETA

"Gustatuko litzaiguke Laudioko saioan, Hendaian bezala, giro polita egotea eta aliantzak sortzeko balio izatea"

Arrazolan egin zuten ekimenaren aurkezpena. / Señora Sariketa

DANELE SARRIUGARTE MOCHALES (Elgoibar, 1989) dabil, besteak beste, II. Señora Sariketa antolatzeko lanean buru-belarri. Ekimenaren nondik norakoak azaldu ditu, Laudion izango baita bigarren saioa larunbat honetan 18:00etan, Faktorian. Ekitaldia irekia da, eta sarrerak salgai daude oraindik

Señora sariketa antolatu duzue bigarrenez, zein helbururekin?

Aurreko urtean bezala, aurten ere, bertsolaritzaren inguruan gabiltzan bertsolari, bertsozale, antolatzaile, gai-jartzaile (etab.) feministak artikulatzea izan da helburua. 

Sariketak izen eta izan berezia ditu. Zer ordezkatzen edo islatzen dute bertsotan señorek?

'Señora' izendapena halako kemen edo indar moduko batekin lotu izan dugu, eta emakume-identitatetik harago joatea nahi genuke, identitate maskulino normatibotik at dauden subjektuei atea irekiz. 

"'Señora' izendapena halako kemen edo indar moduko batekin lotu izan dugu, eta emakume-identitatetik harago joatea nahi genuke, identitate maskulino normatibotik at dauden subjektuei atea irekiz"

Bigarren saioa izango da Faktoriakoa. Zelako harrera izan du orain arte?

Hendaiako saioa eder-ederra izan zen. Enbata gaztetxea beteta egon zen, eta oso giro beroa eta polita izan genuen. Aurten, gainera, sariketa aurkezteko bazkaria egin genuen saioak hasi aurretik, eta hor ere giro bikaina izan genuen. 

Zer lan osatu beharko dituzte bertsolariek?

Ofizioa zortziko handian, ofizioa zortziko txikian, ofizioa puntutan, bakarkakoa (komodina erabiliz) eta koplatan. 

Laudion erabakiko da Leitzan ekainaren 4an jokatuko den finala. Nolakoa izatea aurreikusten duzue?

Gustatuko litzaiguke Laudioko saioan, Hendaian bezala, giro polita egotea eta aliantzak sortzeko balio izatea. Finalaren egunean, are gehiago, egun osoko egitaraua izango dugu eta. 

"Taldetxo bat gabiltza antolaketa kudeatzen... Aliantza horiek artikulatzea da sariketaren alderdi eder bat"

Informazio gehiago nahi duenak non topa lezake?

Instagram eta Twitter kontuetan. Txartelak, bestalde, bertsosarrerak.eus webgunean daude salgai. 

Auzolanean eta Euskal Herriko hainbat txokotako bertsolari, gai-jartzaile eta zaleek antolatzen duzue ekimena... Zer nolako sare lana dago sariketaren atzean?

Antolaketa kudeatzen buru-belarri gabiltza taldetxo bat. Baina, horrez gain, talde zabalago bat dabil gaiak prestatzen, komunikazioan, tokian toki… Aliantza horiek artikulatzea da sariketaren alderdi eder bat. 

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide