50 urte igaro dira euskaltzale talde batek gaur egun Laudio Ikastola dena sortzeko lehen urratsak egin zituenetik. Hori dela eta, egitarau oparoa antolatu du ikastetxeko hezkuntza komunitateak mende erdiko ibilbidea ospatzeko.
Hiru ekitaldi nagusi prestatu dituzte. Maiatzaren 21ean egin zuten lehena: bisita gidatua burutu zuten ikastolak izandako kokalekuak ezagutzeko.
Jai nagusia, ekainaren 11n
Beste bi jarduerak datorren hilabetean egingo dituzte. Ekainaren 10ean ikasturte amaierako jaia izango dute ikastolan, 15:00etatik aurrera. Familia eta ikasleentzako programa izango da. Tailerrak, jolasak eta talentu-erakustaldia egingo dituzte, besteak beste.
Hurrengo egunean, ekainaren 11n, izango da urtemuga ospatzeko jai nagusia. 50 urteko ibilbidean parte hartu duten guraso, ikasle eta langile guztiei bideratua egongo da. Denei aitortza eskainiko dien ekitaldia antolatuko dute horretarako.
Horrez gain, Batxilergoa amaitu duen promozioaren agur ekitaldiak bere tokia izango du programan, eta baita 30 urte bete duen promozioaren harrerak ere.
Bazkariaren txanda helduko da jarraian, ikasle ohi, langile ohi eta gaur egungo langileentzat. Aiaraldea Ekintzen Faktoria arduratuko da otordua prestatzeaz, tokiko elikagai ekologikoak baliatuta. Bi menu egongo dira aukeran: orojalea eta beganoa.
Tiketak Laudio Ikastolan bertan zein Haitzulo, Araba Garagardotegian eta Azoka tabernetan eskuratu ahalko dira, ekainaren 2ra arte. Laudion bizi ez direnek 94 672 67 37 telefonora deituta edo laudio@ikastola.eus helbidera idatzita erreserbatu ahalko dituzte txartelak. Eguna luzatzeko aukera egongo da gero, kantu eta dantzen bidez.
Bukatzeko, gogorarazi dute 50. urteurreneko kamisetak erosteko aukera egongo dela ikastolaren webgunean, ekainaren 2ra arte.
