Josu Apraiz laudioarra Euskadiko txapelduna izan zen larunbatean Durangon, Master 40 kategorian, 5.000 metroko diziplinan. Garaipen horrekin, inoiz lortutako sailkapenik onena erdietsi du Apraizek, nahiz eta markaren aldetik -16:23:83- bere hirugarren markarik onena izan.
Apraizek azaldu dio Aiaraldea Komunikabideari 22 lasterkari batu zirela irteeran: "Guztiak ez ziren nire kategoriakoak. Izan ere, Master 35 eta Master 45ko korrikalariak ere bazeuden". Hasiera arraroa izan zen laudioarrarentzat, buruan jarri baitzen lehen unetik: "Beste batzuek marka onenak zituzten, baina rol hori eman zidaten. Eroso egon nintzen ardura horretan eta niretzat jasangarria zen erritmoa ezarri nuen".
Horrela igaro zituzten lehen hiru kilometroak, zortzi itzulitan zehar, inork ez baitzion erreleborik eman laudioarrari. 3 kilometro eta 400 metro bete ostean, marka onena zuen atletak bizkortu zuen abiadura eta atzean utzi zuen Apraiz. Azken kilometroan beste hiru parte-hartzailek gauza bera egin zuten. "Nik egin nuen saiakera jarraitzeko, baina ez nintzen gehiegi larritu, ez baitziren nire kategoriakoak", argitu du Laudio Atletismo Klubeko kideak.
Azkenean, Apraiz 5. zeharkatu zuen helmuga, baina lehena izan zen heltzen bere kategorian -Master 40-. Pozik bukatu zuen proba, iaz 3. sailkatu baitzen.
Laudioar gehiagok lortu zuten podiumera igotzea. Esaterako, goizean Gaizka Jurado Berrocal gazteak zilarrezko domina eskuratu zuen 500 metroko lasterketan. Sailkapen berarekin amaitu zuten Tomas Laso Delafuentek Master 55 kategorian eta Edu Frutos Sobrinok Master 55 kategorian, baina 1.500 metroko diziplinan.