Alto rango abestia plazaratu du Neifferrek. Musikari laudioarra D'Rocha abeslari bilbotarrarekin batu ditu indarrak, musika urbanoko pieza berria plazaratzeko. Horrez gain, bi dantzariren laguntza izan du bideokliparen grabaketan.
“Ohiko erreakzioei buelta ematearen inguruan”, hausnartu du Aiaraldeko sortzaileak kantan. Hala azaldu dio Aiaraldea Komunikabideari: “Honako egoera hau planteatu genuen bideoklipa sortzerako orduan: Imajinatu taberna edo diskoteka batean zaudela, neska batengana zoazela eta honek kalabazak ematen dizkizula. Zu une horretan gaizki sentitu zaitezke, hori da erreakzio normala, baina posiblea da erreakzio horri buelta ematea. Ez dituzu inoren aurreikuspenak bete behar, zureak soilik bete behar dituzu, gainontzekoek diotenari erreparatu gabe”.
Hala ere, abestiak ez dio ligatzeari erreferentzia egiten. “Edozein tokitan jaso dezakzu ezezko bat: lanean, ikasketetan… egoera horiek zaurgarri bilakatzen zaituzte, baina zu ez zara eman dizuten ezezko hori, ezezkoa eurek eman dizute, ez zuk”.
Sorkuntza prozesuan buru-belarri
Sorkuntza urte oparoa izango da 2022a Neiferrentzat. Abesti gehiago plazaratu nahi ditu, bideoklipez lagundurik. Musika urbanoko hainbat estilo jorratuko ditu kantetan, eta diskoa osatuko du gero guztiekin.
Hala ere, “disko kontzeptualagoa” ere ari da prestatzen, Aiaraldea Komunikabideari aurreratu dionez.