Euskadiko film laburren katalogora gehitu dute Esti Urresolaren Cuerdas lana. Canneseko zinema jaialdian 'Le Rails d’or' saria jaso berri du zuzendari laudioarraren bosgarren lanak, eta aitortza honek aipamen berri gehiagoren atarian jarri dezake film laburra. Izan ere, Euskal Herrian urtero ekoiztutako lanen aukeraketa da Kimuak katalogoa, lan hauek guztiak "nazioarteko ikusleen eskura jarri, eta zinemaldi nagusietan eta ikus-entzunezko ekitaldietan sustatu eta banatzeko".
Aurtengo aukeraketara 75 lan aurkeztu dira, eta 7 hautatu dituzte. Urresolaren Cuerdas film laburrarekin batera, Irati Gorostidiren Contadores, Maider Fernandezen Fe, Ainhoa Olaso eta Enara Garciaren Hemen bizi da maitasuna, Lur Olaizolaren Hirugarren koadernoa, Maider Oleagaren Irrits eta Aitzol Saratxagaren Lanbroa filmak ere hautatu dituzte.
Hauek izan dira 2022ko Kimuak edizioaren epaimahaikideak: Maria del Puy Alvarado ekoizle, gidoilari eta irakaslea; Alejandro Díaz Castaño Gijóngo FICX nazioarteko zinema jaialdiaren zuzendaria; Vanesa Fernandez Zinebi Bilboko film laburren eta zinema dokumentalen nazioarteko jaialdiaren zuzendaria; Iñaki Lazkano Euskal Herriko Unibertsitateko irakasle eta ikertzailea eta Javier Ocaña zinema kritikari eta idazlea.
