LAB sindikatuak oharra zabaldu du bere iritzia emateko Tubacex taldeko azken albisteei buruz. Izan ere, erakundearen ustez, Arabiar Emirerri Batuetan lantegi bat irekitzean, konpainia saiatuko da Aiaraldean dauden fabriken garrantzia murrizten.
Antolakundearen aburuz, ekoizpena deslokalizatzeko saiakera da Tubacex egiten ari dena eta gogoratu du hori mehatxu moduan erabili zuela zuzendaritzak: "Asmo hori jada erakutsi ziguten Enplegua Erregulatzeko Espedientearen aurreko negoziaketetan. Lan baldintzen jaitsiera onartzeko erabili zuten Abu Dabin produkzio lantegiak sortzearen mehatxua".
Horrez gain, sindikatuak hautu horren ardura leporatu die indarrean dagoen lan hitzarmenaren sinatzaileei eta Eusko Jaurlaritzari. Alde batetik, honakoa aipatu du: "enpresa komiteak onartu egin zuen hitzarmenean adostutako baldintzak ez betetzea eta lan orduak gehitu zizkiguten". Jaurlaritzari dagokionez, ordea, sindikatuak beste hau adierazi du: "enpresari babesa eman zioten enpleguaren suntsiketan, lan baldintzen prekarizazioan, lanaldia handiagotzen eta soldata izozten".