2019ko abuztuan Nerbioi ibaian izandako isurketak ondorio nabariak izan ditu. Alde batetik, udal hiltegian zuenez jatorria, Ander Añibarro alkatea, Natxo Urkixo aurreko alkatea eta azpiegiturako arduraduna ikertu zituen Ertzaintzak. Hori dela medio, 2021ean jakinarazi zieten epaiketara jo beharko zutela, ingurumenaren aurkako delituak leporatuta.
Aurtengo martxoan epaitegiak erabaki zuen Ander Añibarro alkatearen kontrako akusazioak ez zuela oinarririk eta berriki gauza bera egin dute Natxo Urkixo aurreko legealdiko udal gobernuburuarekin. EH Bilduko kideak Aiaraldea Komunikabideari azaldu dio ez diola garrantzia berezirik eman auzi guztiari: "Epaiketak aurrera ez egitea guztiz normala da".
Halaber, aurreko alkateak espero du eskualdeko araztegien eraikuntza lanek behin betiko konpontzea egun Nerbioi ibaian dauden isurketa arazoak. "Hori da garrantzitsuena", adierazi du Urkixok,
Alkate ohiak argitu dio Aiaraldea Komunikabideari udal hiltegiaren arduradunak ere ez duela epaiketarik izango.
Ibilbide juridikoa bertan geratu den honetan, gogoratu beharra dago 2019ko isurketaren ondorioz, lehen aldiz itxi zuela hiltegia udalak zenbait hilabetez. 2021ean behin betikoa bilakatu zen itxiera eta horrek protestak sortu zituen eskualdeko lehen eta hirugarren sektorean, bereziki.