2019ko abuztuan Laudioko udal hiltegitik zetozen odol isuriak aurkitu zituen URA agentziak Nerbioi ibaian. Agentziak errekerimendua aurkeztu eta Ertzaintzak ikerketa abiatu zuen ofizioz. Natxo Urkixo Laudioko alkate ohia, Ander Añibarro alkatea eta udal hiltegiko kudeatzailea ikertu zituzten. Soka luzea ekarri zuen gertaerak.Hiltegia ixteko agindua eman zuen udalak, baina abeltzainen protesten ostean, tokiko erakundeak 140.0000 euroko inbertsioa egin eta berriro abiatu zuten zerbitzua.
Hiru ikertuek 2021eko urtarrilean jaso zuten inputazioa, ingurumenaren aurkako delitua egotzita. Delitu penala izanik, ezin zaio administrazioari egotzi, pertsonei baizik. Horregatik inputatu zituzten Añibarro eta Urkixo Laudioko Udaleko arduradun gisa. Horrela azaldu zuen Laudioko alkateak Aiaraldea Komunikabideari eskainitako elkarrizketa batean.
Natxo Urkixoren eta hiltegiko kudeatzailearen aurkako prozedura judizialak aurrera jarraitzen du
Prozedura judizialak aurrera egin, eta duela hilabete batzuk deklaratu zuten alkateak eta alkate ohiak Amurrioko Epaitegian. Kausa artxibatzeko eskatu zuten defentsek, "ez zelako kalterik egon, Nerbioi ibaia gorriz tindatu zuen isuria handia izan arren". Gainera, defentsek azaldutakoaren arabera, isurketen berri izan arren, Udalak ezin zion enpresa arduradunari funtzinamendu akatsak zuzentzeko eskatu. Añibarroren defentsak azpimarratu zuen ez-egite hori ezin zaiola egungo alkateari leporatu, "URAk egindako errekerimenduen ondoren sartu baitzen karguan”.
Gauzak horrela, Ander Añibarro ez inputatzea erabaki du kasua daraman epaileak, eta egungo alkatearen aurka behin-behineko largespena ezartzea ebatzi du autoan. Natxo Urkixoren eta hiltegiko kudeatzailearen aurkako prozedura judizialak, ordea, aurrera jarraitzen du.